გაერთიანებული ერების ორგანიზაცია საქართველოს კოვიდ 19-ის პანდემიის მიერ შექმნილი მძიმე ეკონომიკური სიტუაციის ფონზე დასახმარებლად 1 მილიონ ამერიკულ დოლარს გამოუყოფს.

გაეროს წარმომადგენელთა თქმით, საქართველო იმ 50-მდე ქვეყნის ჩამონათვალშია, რომლებიც ყველაზე პირველი ისარგებლებენ ეკონომიკური შოკისგან საზოგადოების ყველაზე დაუცველი სოციალური ჯგუფებისთვის გამოყოფილი ფინანსური დახმარებით.

„მიღებული დაფინანსებით გათვალისწინებულია ჯანდაცვის, სოციალური და სხვა მუშაკების და ასევე მათი ბენეფიციარების სამედიცინო აღჭურვილობითა და ინდივიდუალური დაცვის საშუალებებით უზრუნველყოფა; სასოფლო-სამეურნეო საშუალებებით ღარიბი შიდა-მეურნეობების დახმარება; წყალზე, სანიტარიასა და ჰიგიენის საშუალებებზე ხელმისაწვდომობის გაუმჯობესება კონფლიქტით დაზარალებულ რეგიონებში; მუნიციპალიტეტების და სოფლის წარმომადგენლების დახმარება, რათა მათ შეძლონ გადაუდებელი სოციალური მომსახურების გაწევა.

"გაეროს გუნდის მხარდაჭერის მთავარი მიმართულება ასევე იქნება ხანდაზმული პირების, ბავშვების, ორსული და მეძუძური დედების დახმარება, მათთვის აუცილებელი სამედიცინო სერვისების მიწოდება; განათლებასა და ბავშვთა სოციალური დაცვის სერვისებზე ხელმისაწვდომობა, მათ შორის ბავშვებზე ძალადობის პრევენცია; ასევე კრიზისული კომუნიკაცია და საზოგადოების ჩართულობა.

"პროექტს ,,საქართველოს მთავრობისა და ადგილობრივი თემების დახმარება პანდემიის შედეგების შესამცირებლად“, ახორცილებს გაეროს ბავშვთა ფონდი, გაეროს განვითარების პროგრამა და გაეროს მოსახლეობის ფონდი, გაეროს სხვა სააგენტოებთან თანამშრომლობით.“- განაცხადა საქართველოში გაეროს წარმომადგენელმა, საბინე მახლმა.