ირანმა ფრანგი წარმოშობის აკადემიკოსს, ფარიბა ადელხას 6 წლით თავისუფლების აღკვეთა მიუსაჯა. მას ბრალად დებენ ეროვნული უსაფრთხოებისათვის ზიანის მიყენებაში. ამის შესახებ მისმა ადვოკატმა განუცხადა როიტერსს ინტერვიუში.

„თეირანის რევოლუციურმა სასამართლომ მას 5 წლით თავისუფლების აღკვეთა მიუსაჯა ირანის ეროვნული უსაფრთხოებისათვის კონსპირაციული ქმედებების ჩადენის გამო, რომლითაც სახელმწიფოსთვი სერიოზული ზიანის საფრთხის წინაშე დადგა. მას აგრეთვე 1 წლით თავისუფლების აღკვეთა მიუსაჯეს ირანის ისლამური რესპუბლიკის მიმართ წარმოებული პროპაგანდის გამო“ - განაცხადა ადელხას ადვოკატმა.

შეგახსენებთ, რომ 60 წლის მეცნიერი 2019 წლის ზაფხულში დააპატიმრეს. ირანმა უარი განაცხადა საფრანგეთის ხელისუფლების მოთხოვნაზე, გაათავისუფლონ მეცნიერი ციხიდან. ირანის მაღალჩინოსნები აცხადებენ, რომ საფრანგეთის ხელისუფლებას უფლება არ აქვს მათ შიდა საქმეებში ჩაერიონ.