"ნიუ იორკ პოსტი" ახალი კვლევის შესახებ წერს - კვლევაში ვკითხულობთ, რომ კორონავირუსის ახალი მუტაცია დიდი ალბათობით მის დასუსტებაზე მიანიშნებს. აღნიშნულ დასკვნამდე არიზონელი მეცნიერები მას შემდეგ მივიდნენ, რაც აღმოჩენილი ახალი მუტაცია 2003 წლის SARS-ის ვირუსის მუტაციას შეადარეს. აღნიშნული მუტაციის გაჩენის შემდეგ SARS-მა დასუსტება დაიწყო და ბოლოს საერთოდ გაქრა.

ახალი კ ვლევების ერთ-ერთი ავტორის, დოქტორ ეფრემ ლიმის თქმით, მკვლევართა ჯგუფმა კვლევის პროცესში ახალი ტექნოლოგია გამოიყენა, რომელსაც Sars-Cov-2-ის გენომის მთლიანად ,,წაკითხვა” შეუძლია.აღნიშნული ტექნოლოგია მეცნიერებს ეხმარება იმის დადგენაში, თუ როგორ ვრცელდება ვირუსი, როგორ მუტირებს და ადაპტირდება ის დროთა განმავლობაში.

მკვლევარებმა 382 კოვიდპაციენტის ცხვირის ნაცხი გამოიკვლიეს და აღმოაჩინეს, რომ ზოგ მათგანში ვირუსს თავისი გენომის მნიშვნელოვანი ნაწილი აკლდა. ახალ კვლევაში, რომელიც ვირუსოლოგიის ჟურნალში გამოქვეყნდა ნათქვამია, რომ ვირუსის ნაწილი აღნიშნულ ნიმუშში სამუდამოდ იყო წაშლილი.