ჩეხეთში რუსეთის საელჩომ პრაღის პოლიციას სთხოვა, დაიცვან მათი ერთ-ერთი დიპლომატი, რომლის ვინაობა გაჟღერებულ იქნა ჩეხეთის მედიის მიერ- ჟურნალისტების თქმით, მისი უშუალოდ მონაწილეობით დაგეგმილი იყო ჩეხი პოლიტიკოსების მოწამვლა.

ჩეხეთში არსებული რუსული დიპლომატიური უწყების თქმით, გაცხადებული უსაფუძვლო და სიმართლეს მოკლებული ბრალდებების გამო ზემოხსენებული მაღალჩინოსანი მუქარის შემცველ წერილებს იღებს. ამის შესახებ წერს BBC.

გასულ თვეს ჩეხური მედიის ინფორმაციით, ერთ-ერთი რუსი აგენტი ჩამოვიდა პრაღაში სპეციალური ჩემოდნით, რომელშიც ტოქსიკური მომწამვლელი ნივთიერება, რიცინი იყო მოთავსებული. ჟურნალისტების ინფორმაციით, საწამლავი უნდა გამოეყენებინათ ჩეხეთის სხვადასხვა ქალაქის, მათ შორის პრაღის მერის წინააღმდეგ, რომელმაც მხარი დაუჭირა ინიციატივას კრემლის რეჟიმის მიერ მოკლული ოპოზიციონერი პოლიტიკოსის, ბორის ნემცოვის სახელი დაერქმია იმ ქუჩას, რომელზეც მდებარეობს რუსეთის საელჩო.

ჩეხეთის ახალი ამბების ერთ-ერთ ტელევიზიაში ზემოხსენებული საიდუმლო ოპერაციის სავარაუდო მონაწილის ვინაობა იქნა გაჟღერებული. ჟურნალისტების ინფორმაციით, ეს პირი უნდა ყოფილიყო ანდრეი კონჩაკოვი, პრაღაში რუსეთის მეცნიერებისა და კულტურის ცენტრის ხელმძღვანელი, რომელიც სავარაუდოდ კრემლის დაზვერვის ოფიცერია.

ჩეხეთში არსებულმა რუსეთის საელჩომ ფეისბუქზე გამოაქვეყნა პოსტი, სადაც ნათქვამია, რომ დიპლომატიური უწყების თანამშრომლები ანტირუსული ინფორმაციული კამპანიის მსხვერპლნი გახდნენ და ამის ფონზე პოლიციისგან ითხოვენ დახმარებას.განცხადებაში ნათქვამია, რომ მათი დიპლომატი ცილისმწამებლური კამპანიის ადრესატი გახდა ჩეხური მედიის მხრიდან.