აშშ-ის სახელმწიფო მდივანმა, მაიკ პომპეომ ირანი ჰიტლერულ გერმანიას შეადარა და განაცხადა, რომ ამერიკა არ დაუშვებს ირანმა ბირთვული იარაღი შექმნას.

„75 წლის წინ აშშ და მისი მოკავშირეები გაერთიანდნენ, რათა მსოფლიო ნაცისტებისა და მათი იდეოლოგიისგან გაეთავისუფლებინათ. ახლა მსოფლიოს სხვა დანაშაულებრივი რეჟიმი ემუქრება და ჩვენ მოვუწოდებთ საერთაშორისო თანამეგობრობას, გაერთიანდეს მსოფლიოში ანტისემიტიზმის მთავარი სპონსორი სახელმწიფოს წინააღმდეგ.

აშშ გამოიყენებს ყველა დიპლომატიურ საშუალებას, რათა ირანისთვის იარაღის მიწოდებაზე გაეროს ემბარგო გახანგრძლივდეს. ჩვენ არ შევეგუებით სტატუს-კვოს და არ დავუშვებთ, რომ ირანმა ოდესმე ბირთვული იარაღი შექმნას“, - განაცხადა პომპეომ.