ლონდონის „ჰიპერ ანთებითი“ დაავადებებათა კლინიკაში 40 ბავშვს კორონავირუსის ტესტები ჩაუტარდათ. სამხრეთ-აღმოსავლეთ ლონდონის კლასტერიდან გარდაიცვალა 14 წლის ბიჭი, რომელსაც ჯანმრთელობის პრობლემები არ ჰქონდა.

როგორც პრესაში იწერება, სახეზეა ახალი ტიპის სინდრომი, რომელიც შესაძლოა კოვიდ-19-თან იყოს ასოცირებული და იგი ბავშვებშიც საფრთხის შემცველია. ნიუ იორკში 64 ბავშვის ჰოსპიტალიზაციის მიზეზი იშვიათი, სიცოცხლისთვის საშიში ანთებითი დაავადება გახდა, რომელიც შესაძლოა კორონავირუსთან იყოს დაკავშირებული. ანთებითი პროცესი ძალიან გავს კავასაკის დაავადებას, რომელიც ცხელებით მიმდინარე მწვავე დაავადებაა და აზიანებს სისხლძარღვებს, განსაკუთრებით მცირე და საშუალო ზომის არტერიებს.

„ჩვენ შესაძლოა პირველი შემთხვევა მარტის შუა რიცხვებში გვქონდა. ჩვენ გვყავდა პაციენტი ბავშვი, რომელსაც ჰქონდა კავასაკის მსგავსი - ტოქსიკური შოკის სინდრომი... ამ ორი კვირის განმავლობაში ჩვენ ვნახეთ ბავშვების კლასტერი, საიდანაც ძალიან ბევრის მდგომარეობა ჰგავს კავასაკის შემთხვევას. მათ მუდმივად აქვთ მაღალი ცხელება და ჩაწითლებული თვალები. დაავადებას ახასიათებს არახანგრძლივი გამონაყარი.“ - აცხადებს ეველინას საავადმყოფოს დირექტორი ექიმი სარა ჰანა.

ანთებითი სინდრომის კოვიდ-19 კავშირის საფუძველს იძლევა დადასტურებული ფაქტები, რომ პაციენტების უმეტესობას, ჰქონდა კორონავირუსი ან მასთან მებრძოლი ანტისხეულები. ნიუ იორკის შტატმა მიიღო გადაწყვეტილება და საავადმყოფოები დაავალდებულა, რომ მულტი სისტემური ანთებითი სინდრომის ან კავასაკის დაავადების აღმოჩენის შემთხვევაში შესაბამისი ორგანოსთვის მიემართათ, რათა პაციენტები კოვიდ-19-ზე შეამოწმონ.