ასობით მომიტინგე, მათ შორის რამდენიმე ცეცხლსასროლი შაშხანებით შეიარაღებული, მიჩიგანის შტატის მთავარ საკანონმდებლო ყრილობის შენობაში შეიკრიბა მაშინ როდესაც კანონმდებლები განიხილავდნენ კორონავირუსის ფონზე დემოკრატიული პარტიის წარმომადგენლისა და შტატის გუბერნატორის, გრეტჩენ უიტმერის მოთხოვნას საგანგებო მდგომარეობის გახანგრძლივებასთან დაკავშირებით.

ძალზე მჭიდროდ განლაგებული ხალხი, რომელთა შორისაც შეიარაღებული ამერიკელი მოქალაქეებიც იყვნენ, ცდილობდნენ საკანონმდებლო ორგანოში შესვლას, თუმცა უწყების შესასვლელთან მდგარმა პოლიციელებმა და კაპიტოლიუმის მომსახურე პერსონალმა შეაჩერა ისინი. „შეგვიშვით, შეგვიშვით“ - ყვიროდნენ პროტესტის მონაწილეები. აგრეთვე ისმოდა ადგილობრივი ხელისუფლების საწინააღმდეგო შეძახილებიც- შტატის გუბერნატორი ჰიტლერს შეადარეს.

კაპიტოლიუმის შენობაში შესვლამდე პოლიციამ დემონსტრანტებს ტემპერატურა გაუზომა, რომლის შემდეგაც მათ მისცეს ნებართვა საკანონმდებლო ორგანოს ფოიეში შესულიყვნენ. მომიტინგეების უმთავრეს მოთხოვნას წარმოადგენს ჩვეულ რეჟიმში აღდგეს ცხოვრება და განახლდეს ეკონომიკური აქტივობა. აღნიშნულ დემონსტრაციებს მხარი დაუჭირა დონალდ ტრამპმაც, რომელმაც ტვიტერის საკუთარ გვერდზე დაწერა- „გაათავისუფლეთ მიჩიგანი“.

GUARDIAN-ის ინფორმაციით, მიჩიგანში კორონავირუსს 3789 ადამიანი ემსხვერპლა.