ჩრდილოეთ კორეის ლიდერი კიმ ჩენ ინი, რომელიც ბოლო 20 დღის განმავლობაში არ გამოჩენილა, პარასკევს სავარაუდოდ მონაწილეობა მიიღო ოფიციალურ ღონისძიებაში. ჩრდილოეთ კორეული საინფორმაციო სააგენტოს თქმით, კომუნისტური პარტიის ხელმძღვანელმა სუნჩონში სასუქის ქარხანა გახსნა.

შეგახსენებთ, რომ კიმ ჩენ ინი არ გამოჩენილა საჯაროდ 12 აპრილის შემდეგ. მან გამოტოვა ყველა აუცილებელი და მნიშვნელოვანი შეხვედრა, აგრეთვე არ დასწრებია თავისი ბაბუის, ჩრდილოეთ კორეის დამაარსებლისათვის, კიმ ირ სენისთვის მიძღვნილ სადღესასწაულო ღონისძიებას.

მის გაუჩინარებასთან დაკავშირებით ინფორმაცია სამხრეთ კორეულმა მედია საშუალებებმა გაავრცელეს და აღნიშნეს, რომ კიმს ოპერაცია გულზე გაუკეთდა, რის შემდეგაც მისი მდგომარეობა ძალზე რთული იყო. ამერიკულ მედიაში აქტიურად იწერებოდა აგრეთვე იმის შესახებ, რომ თითქოს კორეის ლიდერი გარდაიცვალა ოპერაციის დროს, რის მიზეზსაც ექიმის შეცდომას ასახელებდნენ- გულზე პროცედურების დროს ქირურგს ხელი აუკანკალდა და სტენდი არასწორად ჩაუსვა კიმ ჩენ ინს რაც ფატალური შედეგით დასრულდაო,- აღნიშნავდნენ ამერიკული მედია საშუალებები.

ჩრდილო კორეული მედიის ინფორმაციით, კიმ ჩენ ინმა რამდენიმე მაღალჩინოსნის თანხლებით, მათ შორის თავის დასთან ერთად, ქარხნის ამუშავების სიმბოლოდ წითელი ლენტი გაჭრა, რომლის ფონზეც ქარხნის მშენებლები და მუშები თავიანთი ქვეყნის ლიდერის გამოჩენის გამო სიხარულს ვერ მალავდნენ და მას ოვაციებით შეხვდნენ.

სახელმწიფო მედიის მიერ აღნიშნული ვიზიტის ფოტო-მასალა გამოჩნდა ინტერნეტში, თუმცა ვიდეოკადრებს ამ დრომდე არ ავრცელებენ.