მიუხედავად იმისა, რომ კორონავირუსით გარდაცვლილთა რაოდენობა ამერიკაში 52 000- ს გასცდა, ზოგიერთი შტატის ადგილობრივმა ხელისუფლებამ მიიღო გადაწყვეტილება, დაწესებული შეზღუდვები ეტაპობრივად მოხსნას. კოვიდ 19-ის ინფექციით გამოწვეული ეკონომიკური ზარალის გამო ჯორჯიის, ოკლაჰომას და ალასკის შტატებმა უკვე დაიწყეს კარანტინის ფარგლებში დაწესებული საიზოლაციო პოლიტიკის შემსუბუქება.

რესპუბლიკური პარტიის წარმომადგენლებმა, რომლებიც ჯორჯიასა და ოკლაჰომაში გუბერნატორები არიან, გასცეს ნებართვა გაიხსნას სილამაზის სალონები, სპა ცენტრები და სხვადასხვა სახის მაღაზიები. ალასკის ადგილობრივი მთავრობის განკარგულებით აგრეთვე დასაშვებია რესტორნებისა და საცალო ვაჭრობის მაღაზიების ფუნქციონირების აღდგენა.

წინა კვირას დონალდ ტრამპმა განაცხადა, რომ ქვეყანაში ეკონომიკური საქმიანობა ეტაპობრივად აღდგება და კარანტინი მოიხსნება, თუმცა აღნიშნულ შეთავაზებას მკაცრად უპირისპირდებიან დემოკრატიული პარტიის ხელმძღვანელები და სამედიცინო მუშაკები, რომლებიც აღნიშნავენ, რომ ამ გადაწყვეტილებას შესაძლოა ვირუსის გავრცელება უკონტროლო გახადოს და სიკვდილიანობის რაოდენობა მასშტაბურად გაზარდოს.

შეგახსენებთ, რომ აშშ-ში კორონავირუსით ინფიცირებულთა რაოდენობა უკვე 925 758-ია, რომელთაგან 52 217 მათგანი სასიკვდილო აღმოჩნდა. აშშ-ში აგრეთვე ამ დროისთვის ყველაზე მეტი გამოჯანმრთელებული ადამიანია - 110 432 პაციენტი განკურნეს დაავადებისგან.