ირანის რევოლუციის გუშაგთა კორპუსის ხელმძღვანელი ამერიკის შეერთებული შტატების პრეზიდენტის მუქარას გამოეხმაურა და განაცხადა, რომ ირანი გაანადგურებს ამერიკულ საბრძოლო ხომალდებს, თუ ქვეყნის უსაფრთხოება საფრთხის ქვეშ დადგება სპარსეთის ყურეში. ამის შესახებ ინფორმაციას REUTERS-ი ავრცელებს.

„მე ვუბრძანე ჩვენს საზღვაო ძალებს, გაანადგუროს ნებისმიერი ამერიკული ტერორისტული ძალზა, რომელიც სპარსეთის ყურეში ირანის სამხედრო და არასამხედრო გემებს საფრთხეს შეუქმნის“- ამის შესახებ განაცხადა ირანის რევოლუციის დამცველთა კორპუსის მთავარმა სამხედრო გენერალმა, ჰოსეინ სალამიმ - „ სპარსეთის ყურის უსაფრთხოება არის ირანის სტრატეგიული პრიორიტეტების ნაწილი“.

„მე ვეუბნები ამერიკელებს, რომ ჩვენ აბსოლუტურად გაბედულები და სერიოზულები ვართ ჩვენი ეროვნული უსაფრთხოების, საზღვაო საზღვრების, უსაფრთხოების ძალების დაცვაში და აუცილებლად გადამწყვეტად და აგრესიულად ვუპასუხებთ დივერსიის ნებისმიერ მცდელობას“- აღნიშნა სალამიმ.

ირანის სამხედრო მაღალჩინოსანთა აღნიშნული განცხადება არის პასუხი ტრამპის მიერ სამხედრო ძალებისთვის გაცემულ ბრძანებაზე, სადაც პრეზიდენტმა აღნიშნა: „ მე ბრძანება მივეცი ამერიკულ საზღვაო ძალებს გაანადგურონ ნებისმიერი ირანული მცურავი საშუალება, რომლებიც ამერიკულ გემებს სახიფათო მანძილზე მიუახლოვდებიან და ეცდებიან ჩვენი ხომალდების შევიწროებას ზღვაში“.

შეგახსენებთ, რომ საქმე ეხება აპრილის თვეში მომხდარ ინციდენტს, როდესაც სპარსეთის ყურეში ამერიკულ ხომალდს 11 ირანული სამხედრო კატარღა მიუახლოვდა სახიფათო დისტანციაზე და აფერხებდა ამერიკელთა გადაადგილებას.