მირზაანის დედათა მონასტერთან არსებულ სამკერვალოში ყოველ დღე 500-მდე პირბადეს დაამზადებენ და მუნიციპალიტეტის მოწყვლად ჯგუფებს უსასყიდლოდ დაურიგდება

COVID-19 - 18:53, 22 Apr, 2020

860

ეს არის კიდევ ერთი კარგი მაგალითი ეკლესიის სოციალური პასუხისმგებლობისა და თანამონაწილეობისა ქვეყნისთვის მნიშვნელოვან საქმეში - ამის შესახებ საქართველოს საპატრიარქოს საზოგადოებასთან ურთიერთობის სამსახურის მიერ გავრცელებულ განცხადებაში ვკითხულობთ.
დედოფლისწყაროს მუნიციპალიტეტის სოფელ მირზაანის კვირაცხოველობის სახელობის დედათა მონასტერში პირბადეებს შეკერავენ და მოსახლეობას და სამედიცინო პერსონალს უსასყიდლოდ გადაეცემა.
"ხორნაბუჯისა და ჰერეთის ეპაქრიაში, დედოფლისწყაროს მუნიციპალიტეტის სოფელ მირზაანის კვირაცხოველობის სახელობის დედათა მონასტერთან ორი წელია სამკერვალო სახელოსნო ფუნქციონირებს. მონაზვნები აქტიურად არიან ჩართული საზოგადოებრივ საქმიანობაში - სახელოსნოში ხელსაქმით, კერვითა და ქარგვითა არიან დაკავებული. გარდა ამისა, მონასტერში იკერება ეპარქიაში არსებული წმინდა ვახტანგ გორგასლის სახელობის სკოლის-ინტერნატის მოსწავლეების ფორმებიც, იქარგება ლოგოები.
ბოლო დროს ქვეყანაში შექმნილი რთული ეპიდემიოლოგიური მდგომარეობიდან გამომდინარე, მონასტრის დედებმა გადაწყვიტეს ამ საქმეშიც ჩარულიყვნენ და პირბადეების დამზადება დაიწყეს.
მონასტერში სამუშაო პროცესი ჯანდაცვის რეკომენდაციების სრული დაცვით მიმდინარეობს, ყოველდღე აქ 500-მდე პირბადე მზადდება.
მირზაანის დედათა მონასტერთან არსებულ სამკერვალოში დამზადებული 5000 პირბადე უსასყიდლოდ დაურიგდება დედოფლისწყაროს მუნიციპალიტეტის მოწყვლად ჯგუფებს, სამედიცინო პერსონალსა და ყველა იმ ადამიანს, ვინც კორონავირუსთან ბრძოლის წინა ხაზზე დგას." - ნათქვამია განცხადებაში.