მსოფლიოს წამყვანი ქვეყნები კორონავირუსის წარმომავლობის დასადგენად საერთაშორისო გამოძიების დაწყებას აანონსებენ. ამერიკის, გერმანიის, საფრანგეთის და ავსტრალიის მთავრობების გადაწყვეტილებით, აუცილებელია გაირკვეს, რამდენად არის კორონავირუსი ბუნებრივი წარმოშობის და არის თუ არა ის ხელოვნურად შექმნილი.ამის შესახებ ინფორმაციას ავრცელებს reuters-ი.

საერთაშორისო გამოძიების დაწყების შესაძლებლობა ოთხი ქვეყნის ლიდერებმა სატელეფონო საუბრებში განიხილეს. რამდენიმე დღის წინ ამერიკის შეერთებულმა შტატებმა ჩინეთის ცენტრალური მთავრობა და ჯანდაცვის მსოფლიო ორგანიზაცია შეთანხმებულ ქმედებასა და ადრეულ ეტაპზე კორონავირუსის შესახებ ინფორმაციის დამალვაში დაადანაშაულა. ფრანგული მხარე აცხადებს, რომ იქამდე , სანამ გაირკვევა თუ ვისი ბრალია ვირუსის გავრცელება, მანამ უნდა მოხდეს პანდემიის დამარცხება.

„ახლახანს მქონდა საუბარი პრეზიდენტ დონალდ ტრამპთან. ჩვენ ძალზე კონსტრუქციულად განვიხილეთ მიმდინარე მდგომარეობა და დავსახეთ კონკრეტული ღონისძიებები ჯანდაცვის მიმართულებით კოვიდ 19-ის გავრცელების წინააღმდეგ. შევთანხმდით იმ საკითხთან მიმართებით, რომ აუცილებლად უნდა მოხდეს ბიზნესის ამუშავება და ეკონომიკის გაჯანსაღება. ავსტრალია და ამერიკა გახლავთ საუკეთესო მეგობარი სახელმწიფოები, ჩვენ ერთობლივად გავაგრძელებთ მუშაობას კოროანვირუსით მიყენებული ზარალისგან ქვეყნის გაჯანსაღებას“ - აღნიშნა ავსტრალიის პრემიერმა, სკოტ მორისონმა.