"პოლიტიკოსი, რომელიც ამბობს, რომ ვმალავთ დაავადებას, შეურაცხყოფას გვაყენებს ექიმებს"

"პოლიტიკოსი, რომელიც ამბობს, რომ ვმალავთ დაავადებას, შეურაცხყოფას გვაყენებს ექიმებს" - დავით გადელია

COVID-19 - 17:29, 19 Apr, 2020

1905

თეორიულად შეუძლებელია უამრავი დაავადებული დადიოდეს უკონტროლოდ ქალაქში. მაქსიმუმ- დაავადებულთა 10-20 პროცენტი, რაც არაა დიდი რიცხვი და მით უფრო „უამრავი“. პოლიტიკოსი, რომელიც ამას ამბობს, შეურაცხყოფას გვაყენებს ჩვენ, ექიმებს - ამის შესახებ ბოჭორიშვილის სახელობის კლინიკის გენერალური დირექტორი დავით გადელია სოციალურ ქსელში წერს.
გადელიას თქმით, ხელისუფლებას ინფიცირებულთა რაოდენობის დათვლასთან არანაირი შეხება არ აქვს და კლინიკების მიერ მიწოდებული მონაცემებით ხელმძღვანელობენ.

„იმდენად მნიშვნელოვანი საკითხია და სწორედ ამ სადღესასწაულო დღეებში კეთდება სპეკულაცია, რომ ახლავე ითხოვს განმარტებას: კოვიდ-19 -ის დადგენა ხდება კლინიკებში, ე.წ. პისიარის კვლევით დამოწმებისას (მაქსიმალურად გასაგებად მინდა მოგაწოდოთ). პოზიტიური პასუხის შემთხვევაში (ანუ, როცა დასტურდება), ავადმყოფებს ვითვლით ჩვენ და დაავადებათა კონტროლის ცენტრი. თვლაში და გამოვლენაში არავითარ მონაწილეობას არ იღებს სამინისტრო, როგორც სახელმწიფო (დაავადებათა კონტროლის ცენტრიც, ცხადია ასევე სახელმწიფო სტრუქტურაა, თუმცა მას ზეგავლენის მოხდენა არ შეუძლია კლინიკებზე).

კლინიკები დაინტერესებული ვართ, რომ არცერთი კოვიდ დაავადებული არ გაგვეპაროს! ფინანსურადაც კი სისულელეა ჩვენთვის დაავადებულის დამალვა, რომ არაფერი ვთქვათ ეპიდემიოლოგიურ და თუნდაც მორალურ ასპექტზე, რომელიც არავისზე ნაკლები არ გვაქვს. ვიკვლევთ ყველა იმ საეჭვოს, რომელსაც რაიმენაირად აქვს რისკი, გადადებოდა კორონა ვირუსი. ამის მიუხედავად, საკმაოდ მცირე პროცენტია დადებითი პასუხები. ანუ, თეორიულად შეუძლებელია უამრავი დაავადებული დადიოდეს უკონტროლოდ ქალაქში. მაქსიმუმ- დაავადებულთა 10-20 პროცენტი, რაც არაა დიდი რიცხვი და მით უფრო „უამრავი“. პოლიტიკოსი, რომელიც ამას ამბობს, შეურაცხყოფას გვაყენებს ჩვენ, ექიმებს, რომ ვმალავთ დაავადებას- რადგანაც სახელმწიფოს მხოლოდ ჩვენს მიერ უკვე აღმოჩენილი და დათვლილი რიცხვები მიეწოდება და მანიპულირების არანაირი ბერკეტი არა აქვს.

ამ დიდებულ დღეს არავის გალანძღვა არ მინდა, ამიტომ ვცდილობ დავიჯერო, რომ როდესაც მავანი პოლიტიკოსები ასეთ განცხადებას აკეთებენ, ან გადიდებულ თვალიანი შიშით მოსდით, ან საკითხის სრული უვიცობით. სავარაუდოდ, ორივეთი ერთად და იმედი მაქვს, არა აქვთ ჩვენი შეურაცხყოფის სურვილი“ , – წერს ბოჭორიშვილის კლინიკის გენერალური დირექტორი.