დაავადებათა კონტროლის ეროვნულმა ცენტრმა დღეს ვიდეო გაავრცელა, სადაც ექიმები მოსახლეობას სახლში დარჩენისკენ მოუწოდებენ.

დიდი მადლობა ყველას, ვინც ითვალისწინებს დაავადებათა კონტროლის ცენტრის რეკომენდაციებს კორონავირუსულ ინფექციასთან ბრძოლის პროცესში. დარწმუნებული ვარ, რომ ყველა ერთად, ჩვენი საზოგადოება, საქართველოს სახელმწიფო, ჩვენ, ექიმები დავამარცხებთ ამ ვერაგ დაავდებას. დარჩით სახლში, - ცენტრის ხელმძღვანელის, ამირან გამყრელიძის ამ სიტყვებით იწყება ვიდეომიმართვა, რომელშიც მისივე თანამშრომლებთან ერთად მოუწოდებს მოსახლეობას, სახლში დარჩენისკენ.

ვიდეოში დაავადებათა კონტროლის ცენტრის ხელმძღბანელის მოადგილის, პაატა იმნაძის მოწოდებაც არის: „დარჩით სახლში, ოღონდ საკუთარ სახლში, არა მეგობრის და მეზობლის, არამედ საკუთარ სახლში.

ამ დროისთვის, საქართველოში კორონავირუსი 388 ადამიანს დაუდასტურდა, აქედან 86 უკვე გამოჯანმრთელდა. გარდაიცვალა 4. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.