ხელისუფლების გადაწყვეტილება: ბოლნისი და სოფელი რაჭისუბანი დანარჩენი მუნიციპალიტეტისგან იქნას გამოყოფილი

COVID-19 - 17:21, 17 Apr, 2020

685

ბოლნისი და სოფელი რაჭისუბანი დანარჩენი მუნიციპალიტეტისგან იქნა გამოყოფილი - ამის შესახებ განცხადება სოზარ სუბარმა ცოტა ხნის წინ გააკეთა. გადაწყვეტილების მიზეზად ხელისუფლება ვირუსის გავრცელების პრევენციას ასახელებს.

სუბარის თქმით, ბოლნისი დაზიანებული მუნიციპალიტეტია, რადგან ინფიცირებულთა რიცხვმა 47-ს მიაღწია.

„მივიღეთ გადაწყვეტილება და რამდენიმე ადგილი გამოვყავით, რომლებიც აეკრძალათ მუნიციალიტეტის სხვა დასახლებულ ადგილებთან ურთიერთობა. ასეთი პირველი იყო ქვემო ბოლნისი და ზომებმა შედეგი მოგვცა ის, რომ 6 ზე გაჩერდა და იმის შემდეგ აღარ გაიზარდა ინფიცირებულთა რაოდენობა.

შემდეგ იყო საფრთხე სავანეთი სადაც 5 ადამიანია დაინფიცირებული და დღეს მივიღეთ გადაწყვეტილება, რომ თვითონ ქალაქი ბოლნისი და სოფელი რაჭისუბანი იქნა გამოყოფილი დანარჩენი მუნიციპალიტეტისგან. გადაწყვეტილება იმან განაპირობა, რომ უკვე მკვეთრად გაიზარდა უშუალოდ ქალაქ ბოლნისში დაინფიცირებულთა რაოდენობა. დაინფიცირებულია არაერთი სამედიცინო პერსონალი და რადგანაც სამედიცინო პერსონალს უხდებათ ძალიან ბევრ ადამიანთან ურთიერთობა, გაჩნდა საფრთხე ხომ არ არის მოსახლეობის ფართო ფენაზე გასული. ამიტომაც ვიწყებთ ძალიან ფართო სკრინინგს, შემოწმებას, ტესტირებას, რომ ბოლომდე აღმოვფხვრათ ყველა კერა, რომელიც შეიძლება იყოს.

გარდა სავანეთისა და ქვემო ბოლნისისა, დღეს ბოლნისი და სოფელი რაჭისუბანი არის გამოყოფილი დანარჩენი მუნიციპალიტეტისგან და რაჭისუბანსა და ქალაქ ბოლნისს შორისაც გაკეთებულია საზღვარი. სულ 5 საკონტროლო პუნქტია და მიმოსვლა მაქსიმალურად არის შემცირებული.

მთლიანობაში მოსახლეობა ზუსტად იცავს კარანტინის პირობებს, ბოლნისში და რაჭისუბანში მოსახლეობა გარეთ არ დადის. ბოლნისი ერთ-ერთი ყველაზე დაზიანებული მუნიციპალიტეტია იმიტომ, რომ 47-ს მიაღწია ინფიცირებულთა რაოდენობამ.

კიდევ ერთი საკარანტინე ზონა გვაქვს გამოყოფილი, ოღონდ არა დაინფიცირების გამო, ეს არის კაზრეთი და ბალიჭები. გამოვყავით იმიტომ, რომ იქ მუშაობს „არემჯი გოლდი“, ძალიან ბევრი ადამიანი ერთადაა და იმისთვის, რომ იქ რაიმე ინფექციის გავრცელება გამოირიცხოს ქალაქი კაზრეთი და სოფელი ბალიჭები არის გამოყოფილი. “, - განაცხადა სოზარ სუბარმა.