კორონავირუსთან ბრძოლის ყველაზე ეფექტურ გზად სოციალური დისტანცირებაა მიჩნეული. ამისთვის კი ხშირად გვესმის სიტყვები „დარჩი სახლში“. მიუხედავად იმისა, რომ საფრთხის წინაშე ჩვენი, ჩვენი ოჯახის წევრების და მეგობრების სიცოცხლე და ჯანმრთელობაა, რეკომენდაციის შესრულებასთან დაკავშირებით ქვეყანაში პრობლემები გრძელდება. სწორედ ამაზე საუბრობს ეროვნული ბიბლიოთეკის დირექტორი გიორგი კეკელიძე და მოსახლეობას აფრთხილებს, რომ თუ სახლში არ დავრჩებით საქართველო იტალიაზე ცუდ მდგომარეობაში აღმოჩნდება.

„მეგობრებო, გარწმუნებთ: იტალია არ განმეორდება!

არამედ იქნება ბევრად უარესი!

რას გაშინებთ და იმას გაშინებთ, რომ

იტალიას ჩვენზე გაცილებით ძლიერი ეკონომიკა და ჯანდაცვის სისტემა აქვს, ათასობით ქართველს ინახავს დღემდე და ის ქართველები აქეთ ინახავენ ასიათასს.

ჯერ კიდევ არის დრო!

დაფიქრდი და

#დარჩისახლში

მე მოხალისედ ვმუშაობ და ყოველდღე ვხედავ - ქუჩებში, უბნებში, მრევლს თუ ერს, ეს ამბავი სხვა ოთახიდან გამოსული ფილმის ხმა ჰგონია. არადა, ეს სიკვდილის ხმაა და თუ წავუყრუებთ, ძალიან, ძალიან ახლოდან გავიგონებთ!

გახსოვდეთ სიცოცხლე - თქვენიც და სხვისიც!“