2 პაციენტთან მიმართებით მივიღეთ უარყოფითი პასუხი და ჩავთვალოთ, რომ კიდევ ორი პაციენტი გამოგვიჯანმრთელდა - ამის შესახებ თბილისის ინფექციური საავადმყოფოს სამედიცინო დირექტორმა მარინა ეზუგბაიამ განაცხადა. მისი თქმით, 24 საათში პაციენტებს კიდევ ჩაუტარდებათ განმეორებითი ტესტი და ზუსტად გვეცოდინება გამოჯანმრთელდნენ თუ არა.

„ახალი პაციენტების რაოდენობა, ამ ეტაპზე, არ გვაქვს. ასევე, ჩვენც დღეს 12 პაციენტთან მიმართებით ჩავატარეთ ტესტირება. ამ 12 პაციენტიდან პირველად ტესტზე ყველა პასუხი უარყოფითი იყო. განმეორებით ჩატარებული გამოკვლევებით PCR ტესტირებით, 2 პაციენტთან მიმართებით მივიღეთ უარყოფითი პასუხი და ჩავთვალოთ, რომ კიდევ ორი პაციენტი გამოგვიჯანმრთელდა.

რამდენიმესთან კი PRC ტესტი უარყოფითია და დინამიკაში 24 საათის ინტერვალით გავიმეორებთ ტესტს. მათი გამოჯანმრთელების საკითხიც ხვალ გადაწყდება. აქედან გამომდინარე, ცენტრში 48 პაციენტი გამოჯანმრთელდა, ქვეყნის მასშტაბით კი 71 პირი“, - განაცხადა ეზუგბაიამ.