კორონავირუსის სიმპტომების მქონე პაციენტს ახალგორში დიმედროლით, ანალგინითა და ლევომიცეტინით "უმკურნალეს"

კორონავირუსის სიმპტომების მქონე პაციენტს ახალგორში დიმედროლით, ანალგინითა და ლევომიცეტინით "უმკურნალეს" - მამაკაცი გარდაიცვალა

COVID-19 - 11:57, 15 Apr, 2020

1002

გასულ კვირას ახლაგორის რაიონულ საავადმყოფოში ორი ადამიანი გარდაიცვალა, ხოლო კიდევ ორი პაციენტის მდგომარეობა მძიმეა და ისინი სასწრაფო ოპერაციას საჭიროებენ, თუმცა, კორონავირუსის გამო გამყოფი ხაზი ჩაკეტილია და მათ თბილისში მკურნალობის გაგრძელების უფლებას არ აძლევენ.

განსაკუთრებით აღმაშფოთებელია 65 წლის მამაკაცის გარდაცვალების ისტორია. იგი ერთ-ერთი ქეიფის შემდეგ ცუდად გახდა და ორი კვირა პირღებინებითა და დიარეით იტანჯებოდა. მან ორჯერ გამოიძახა სასწრაფო დახმარების ბრიგადა, მაგრამ, რეალური მკურნალობის ნაცვლად "ექიმებმა" მას ანალგინითა და დიმედროლით მკურნალობა შესთავაზეს, მეორედ კი ლევომიცეტინი გამოუწერეს.

სამი დღის წინ მას წნევა დაუვარდა და გაუწყლოვანება დაემართა. საავადმყოფოში გადაყვანისას მას გასტროენტერიტი დაუდგინეს, ისევ ანალგინი და დიმედროლი დაალევინეს და გადასხმა გაუკეთეს. 14 აპრილის დილას პაციენტი გარდაიცვალა.

ადგილობრივი აქტივისტისა და ჟურნალისტის თამარ მეარაყიშვილის ინფორმაციით, ახალგორში სამედიცინო მომსახურების მხრივ მძიმე მდგომარეობაა, რაც კარანტინის რეჟიმმა კიდევ უფრო გააუარესა. დადასტურებულია ფაქტები, როცა ექიმები პაციენტის დიაგნოზს გუგლის მეშვეობით უსვამენ, ხოლო მკურნალობის პირობები საერთოდ აუტანელია. მისი თქმით, რაიონულ საავადმყოფოში ორი პაციენტია, რომელთაგან ერთს სასწრაფოდ ესაჭიროება გულზე ოპერაცია, ხოლო მეორეს - ქიმიოთერაპია, ეს კი მხოლოდ თბილისშია შესაძლებელი.