თბილისის ინფექციური საავადმყოფოს სამედიცინო დირექტორის, მარინა ეზუგბაიას აცხადებს, რომ იმედი აქვს, მომდევნო დღეებში საქართველოში კორონავირუსის შემთხვევები 24 საათში 30-ზე მეტი არ იქნება.

ეზუგბაიას თქმით, შემთხვევების მატება მოსალოდნელია, თუმცა თუ ასეულები არ იქნება, ამ პრობლემას შედარებით ადვილად გადავლახავთ.

„შიდა გავრცელების ეტაპზე ჩვენ გადასულები ვართ უკვე, უბრალოდ აქ ლაპარაკია ალბათ გარკვეულწილად უფრო მომატებაზე, რადგან დღეს დაფიქსირდა პირველი დღე, როცა ტესტირების შედეგად 30 ახალი პაციენტი შემოგვემატა. ვიმედოვნებ, ხვალ და ზეგ ეს მაჩვენებელი არ იქნება 30-ზე მეტი, პირიქით იქნება ნაკლები. ამ შემთხვევაში შეიძლება, შედარებით წყნარად ვიყოთ. საერთოდ, შემიძლია ვთქვა, რომ, რა თქმა უნდა, მოსალოდნელია დაავადების მატება, მაგრამ თუ ასე გაგრძელდება, ასეულები არ იქნება და იქნება მხოლოდ ათეულები, ალბათ ამ პრობლემას შედარებით ადვილად გადავლახავთ. ამისთვის აუცილებელია, დარჩით სახლში, სულ ამას ვლაპარაკობთ, დარჩით სახლში“ , – განაცხადა ეზუგბაიამ.