იტალიაში პრემიერ ჯუზეპე კონტის გადაწყვეტილებით, პატარა მაღაზიების მფლობელებს მიეცემათ უფლება საკუთარი ობიექტები ეტაპობრივად აამუშაონ. მთავრობამ ნება დართო ბიზნესმენებს გახსნან წიგნის მაღაზიები, სამრეცხაოები, საკანცელარიო და ბავშვთა ტანსაცმლის მაღაზიები. სხვადასხვა რეგიონში ეპიდემიოლოგიური სიტუაციის შესაბამისად, ეტაპობრივად მოიხსნება ტოტალური კარანტინი.

ხელისუფლების წარმომადგენელთა თქმით, ზემოხსენებული პროცესი 3 მაისამდე გაგრძელდება. მთავრობამ აგრეთვე გააფართოვა ნებადართული საწარმოო საქმიანობების ნუსხა, რათა განახლდეს სატყეო მეურნეობა, ლანდშაფტის მოვლა-პატრონობა და ჰიდრავლიკური საქმიანობები. გამოცემული დადგენილებით, აგრეთვე მუშაობას აქტიურად განაახლებენ კომპიუტერების მწარმოებლები, ქაღალდისა და მუყაოს პროდუქციის საბითუმო მოვაჭრეები.

შეგახსენებთ, რომ იტალია ევროპაში კორონავირუსისგან ყველაზე მეტად დაზარალდა. ქვეყანა ტოტალურ კარანტინშია მოქცეული. დაღუპულთა რიცხვი კი 20 465-ს შეადგენს. ინფექციისგან გამოჯანმრთელებულთა რაოდენობა კი 35 435-ია.