თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, საქართველოში, დღე-ღამის განმავლობაში კორონავირუსის 30 ახალი შემთხვევა პირველად დაფიქსირდა.

მისი თქმით, შესაძლოა, სხვა დღეებში შემთხვევებმა ამ რაოდენობით არ მოიმატოს, ამიტომ პიკზე საუბარი ჯერ ნაადრევია.

„ეს პირველი შემთხვევაა, თუ ასე არ გაგრძელდება, მაშინ ალბათ პიკზე არ ვილაპარაკებთ. იყო შემთხვევა, როცა ერთ დღეს ცოტა უფრო მეტი შემთხვევები იყო, მეორე დღეს ნაკლები. ვნახოთ, ნუ გავუსწრებთ მოვლენებს. ხვალ, ზეგ როგორი მატება გვექნება, ერთი დღე არ არის კანონზომიერი, რომ გავაგრძელოთ შემდეგ დღეებზე“ , – განაცხადა ეზუგბაიამ.

ამ დროისთვის, საქართველოში კორონავირუსი 296 ადამიანს დაუდასტურდა, მათგან 68 გამოჯანმრთელდა, 3 კი გარდაიცვალა.