"ბზობის დღესასწაულზე არ ყოფილა..." - ვინ არის და რომელ ტაძარში მსახურობდა კორონავირუსით ინფიცირებული სასულიერო პირი

COVID-19 - 10:55, 14 Apr, 2020

1444

კორონავირუსით ინფიცირებულ სასულიერო პირს მაღალი ტემპერატურა და მშრალი ხველა აღენიშნება. ის რესპუბლიკური საავადმყოფოდან ბოჭორიშვილის კლინიკაში გადაიყვანეს, სადაც მისი ოჯახის წევრები არიან მოთავსებული.

„დადასტურებულია კოვიდ-19-ის დიაგნოზი. გამოვლენილია მშრალი ხველა და ტემპერატურის მაღალი მაჩვენებელი, შემოიყვანეს გუშინ. ოჯახის სულ 3 წევრია მოთავსებული, მაგრამ რომელს რომლიდან გადაეცა, არ ვიცით. ვინ არის წყარო არ ვიცით. მისი ოჯახის წევრების ჯანმრთელობის მდგომარეობა დამაკმაყოფილებელია, ისინიც გუშინ შემოიყვანეს“,- განაცახდა ბოჭორიშვილის სახელობის კლინიკის სამეთვალყურეო საბჭოს თავმჯდომარის მაკა სოლოღაშვილმა.

"ნიუპოსტის" ინფორმაციით, სასულიერო პირი წმინდა იოანე ღვთისმეტყველის რუსულ ეკლესიაში მსახურობდა. ტაძარი დილიდან დახურულია.

"ნიუპოსტს" უყვებიან, რომ მამაოს ბოლო დღეებში ხველა აღენიშნებოდა. ამიტომ ის ბზობის დღესასწაულზე ტაძარში არ იმყოფებოდა.

მრევლის თქმით, მამა გ.პ-მ წირვა ხარების დღესასწაულზე აღავლინა. ტაძარში ზიარებაც შესრულდა, თუმცა მრევლის დიდი ნაწილი ლოცვას არ დასწრებია.

დღეს დილიდან დახურულია როგორც რუსული ეკლესია ასევე ამავე ეზოში მდებარე ქართული ტაძარიც, რომელსაც ლურჯ მონასტერს ეძახიან. ორივე ტაძარი სადეზინფექციო სამუშაოების ჩატარების შემდეგ, 48 საათში გაიღება.

ამ დროსთვის უცნობია სასულიერო პირის დაინფიცირების წყარო. ინფიცირებულია მისი და და დისშვილი. ქალი მედიკოსია.

ამ დროისთვის კორნავირუსით სულ 296 ადამიანია ინფიცირებული, მათგან 68 გამოჯანმრთელდა, 3 კი გარდაიცვალა.