გავრცელებული ინფორმაციით, თბილისში, COVID-19 სასულიერო პირს დაუდგინდა

COVID-19 - 04:07, 14 Apr, 2020

1225

გავრცელებული ინფორმაციით, თბილისში, ახალი კორონავირუსი სასულიერო პირს დაუდგინდა. როგორც არაოფიციალური წყაროები ირწმუნებიან, დედაქალაქის ცენტრალურ უბანში მდებარე ტაძრის მამაომ ბზობის დღესასწაულზე წირვა აღავლინა.

სასულიერო პირს ახალი კორონავირუსი გუშინ დაუდასტურდა. ინფიცირებულია მისი დაც, რომელიც მედიკოსია.

როგორც ამბობენ, თბილისის მედიცინის ინსტიტუტის ექთანი სამსახურში დადიოდა და ათობით ადამიანთან ჰქონდა კონტაქტი.

ამ დროისთვის არსებული ინფორმაციით, ახალი კორონავირუსი დაუდასტურდათ სასულიერო პირის დისშვილსა და დის დედამთილს.

არის თუ არა მედიცინის ინსტიტუტის თანამშრომლების ინფიცირების წყარო სასულიერო პირი ამაზე განმარტებები სავარაუდოდ რამდენიმე საათში გაკეთდება.

ოფიციალურად კი ცნობილია, რომ თბილისის მედიცინის ინსტიტუტის მედიკოსებს კორონავირუსი დაუდასტურდათ. დაავადებულთა შორის ერთი ოჯახის წევრებიც არიან.

ერთ-ერთი ვერსიით, საპატრიარქოში გამართულ აუდიენციაზე, რომელსაც პრემიერ-მინისტრი და ასევე დაავადებათა კონტროლის ეროვნული ცენტრის ხელმძღვანელი ესწრებოდნენ, სასულიერო პირის დაინფიცირების საკითხიც განიხილეს.

შეხვედრა ისე დასრულდა რომ მხარებს კომენტარები არ გაუკეთებიათ. ამ დრომდე უცნობია რა გადაწყვეტილება მიიღო საპატრიარქომ. წინა დრეებში გავრცელებული განცხადებებიდან კი ჩანს, რომ საპატრიარქო პოზიციებს არ ცვლის და აღდგომის დღესასწაულზე ტაძრებში მრევლს ელოდება.

უცვლელია ასევე ზიარების წესიც.

უცნობია ისიც, რას მოიმოქმედებს სახელმწიფო იმ ადამიანების მიმართ, ვინც აღდგომის ღამეს კომენდანტის საათს დაარღვევს.