ამერიკის ალერგიისა და ინფექციური დაავადებების ეროვნული ინსტიტუტის დირექტორის, ენტონი ფაუჩის თქმით, ქვეყანაში უფრო ადრე რომ დაწესებულიყო მკაცრი სოციალური დისტანცირების რეჟიმი, ბევრად მეტი ადამიანი გადაურჩებოდა კორონავირუსს.

„თუ სწორად გავაკეთებდით დასაწყისიდანვე- დავხურავდით ყველაფერს, შესაძლოა დღეს განსხვავებული სურათი გვქონოდა“- განაცხადა ფაუჩიმ CNN-თან საუბრისას. მისი თქმით, ამ ამბის ამგვარად განხორციელება ძალზე დიდ სირთულეებთან იყო დაკავშირებული. ფაუჩიმ აღნიშნა, რომ მკაცრი საიზოლაციო ღონისძიებების ნაადრევად განხორციელების შემთხვევაში, უკვე მასის დასაწყისიდან დაუბრუნდებოდა ამერიკის გარკვეული ნაწილი ნორმალურ ცხოვრებას.

„უამრავი ფაქტორი გახდა დღევანდელი სიტუაციის განმსაზღვრელი აშშ-ში- მათ შორის მოსახლეობის რაოდენობა და არაერთგვაროვნება. ჩვენ რეკომენდაციებს ვიძლევით, რომელსაც ზოგჯერ ითვალისწინებენ, ზოგჯერ კი არა“ - ამბობს ფაუჩი.

შეგახსენებთ, რომ დღეს აშშ-ში კორონავირუსის მთავარი ეპიცენტრია, სადაც ინფიცირებული მოსახლეობის რაოდენობა 560 433-ს შეადგენს, რომელთაგან 22 115 გარდაიცვალა. განსაკუთრებით მძიმეა მდგომარეობა ნიუ-იორკში, სადაც 10 000-ზე მეტი ადამიანი დაიღუპა კოვიდ 19-ის ვირუსისსგან.