რუსეთში ერთი დღე-ღამის განმავლობაში კორონავირუსით ინფიცირების 2186 შემთხვევა დაფიქსირდა, 24 პაციენტი კი გარდაიცვალა.

საერთო ჯამში, მთელი რუსეთის მასშტაბით ინფიცირებულთა რაოდენობა 15. 770 ადამიანამდე გაიზარდა, 130 გარდაიცვალა, ხოლო 1291 - განიკურნა.

ამავე დროს, მდგომარეობა ბოლო დღეების განმავლობაში განსაკუთრებით გაუარესდა მოსკოვსა და მის შემოგარენში: ინტერნეტით არაერთხელ გავრცელდა კადრები, სადაც ჩანს, როგორ დგანან საცობში სასწრაფო დახმარების მანქანები, რომლებსაც, სავარაუდოდ, კორონავირუსით ინფიცირებული და ორმხხრივი პნევმონიის მქონე პაციენტები კლინიკებში გადაჰყავთ.

მდგომარეობის სიმძიმეს მოსკოვსა და მოსკოვის ოლქში ადასტურებენ კრემლშიც: დიმიტრი პესკოვი ამბობს, რომ საავადმყოფოები და მედიკოსები "გაძლების ზღვარზე" მუშაობენ.