"მიმდინარეობს საკითხზე სამედიცინო მოკვლევა"- ქობულეთის კლინიკა, სადაც კოვიდ 19-ით ინფიცირებულ პაციენტს მკურნალობდნენ, დაკეტეს -

COVID-19 - 15:45, 08 Apr, 2020

897

ქობულეთის კლინიკა, სადაც კოვიდ 19-ით ინფიცირებულ ქალს მკურნალობდნენ დაიკეტა. როგორც ირკვევა, ამავე კლინიკაში იყო მოთავსებული პაციენტის მამა, თუმცა ის კლინიკიდან ისე გაწერეს, რომ მისთვის კორონავირუსზე ტესტი არ გაუკეთებიათ. მამაკაცი კლინიკაში პნევმონიის დიაგნოზით მოათავსეს, თუმცა ექიმებს კორონავირუსზე ეჭვიც კი არ შეპარვიათ.
კლინიკაში ეპიდემიოლოგები მუშაობენ, რომლებიც ადგეგენ ჰქონდა თუ არა ადგილი ექიმების დაუდევრობას, რამაც კონტაქტები გაზარდა და ეპიდაფეთქება გამოიწვია.
აღსანიშნავია, რომ სწორედ მამა-შვილის კლასტერს წარმოადგენს ქობულეთში დადასტურებული 5 ახალი შემთხვევა. ამ დროსთვის 60 წლამდე ქალის 37 კონტაქტია გამოკვეთილი.

კლინიკაში იმყოფებიან ეპიდემიოლოგები, აჭარის საზოგადოებრივი ჯანდაცვის ცენტრის წარმომადგენლები, ასევე აჭარის ჯანდაცვის მინისტრის მოადგილე ნინო ნიჟარაძე.

ნიჟარაძის განცხადებით, მიმდინარეობს ვიზიტებისას ინფიცირებულებთან კონტაქტში მყოფი მედიკოსების იდენტიფიკაციის პროცესი. ამასთან მისი თქმით, მიმდინარეობს საკითხზე სამედიცინო მოკვლევაც.

აჭარის ჯანდაცვის მინისტრის მოადგილის, ნინო ნიჟარაძის ინფორმაციით, 60 წლის ქალის ახლობლებს ბიოლოგიური კვლევა ჩაუტარდათ და 16 პირიდან 5-ს კორონავირუსი დაუდასტურდა.

„კორონავირუსი დაუდასტურდა მამაკაცს, რომელიც რამდენიმე დღის განმავლობაში აღნიშნულ კლინიკაში, ფილტვების ანთების დიაგნოზით მკურნალობდა“, - განაცხადა ნიჟარაძემ.

როგორც გაირკვა, ქალის დაინფიცირების წყარო არ არის ცნობილი.

„მამა ქობულეთში ცხოვრობს, ინფიცირებულთაგან სამი პირია, რომელიც ქობულეთში მამის სამეზობლოდან არიან. 60 წლის ქალიც ქობულეთის ერთ-ერთ სოფელში იმყოფებოდა და მასთან კონტაქტში 37 პირია გამოკვეთილი. აქედან 17 მედპერსონალია, ხოლო 20 ოჯახის წევრები და მეზობლები არიან. კონტაქტების რაოდენობა ამ დრომდე ზუსტდება, ასევე მედიკოსთა რაოდენობაც ზუსტდება, ვისაც ხუთ ახალ ინფიცირებულთან კონტაქტი ჰქონდა. კლასტერთან დაკავშირებით, ყველა პირი თვითიზოლაციაში იმყოფება და მათ ანალიზი სახლებში აუღეს.

რაც შეეხება ინფიცირებულებს, ისინი კლინიკა „მედალფაში" არიან გადაყვანილი. აჭარაში კორონავირუსით 14 ადამიანია ინფიცირებული“, - განაცხადა ნინო ნიჟარაძემ.