სკანდალი ოკუპირებულ აფხაზეთში: კორონავირუსით ინფიცირებულად გამოცხადებულ მამაკაცს ვირუსი არა აქვს

COVID-19 - 14:32, 08 Apr, 2020

1090

გუდაუთის ინფექციურ საავადმყოფოში მოთავსებული, კორონავირუსით ინფიცირებულად გამოცხადებული მამაკაცის ძმისშვილი "ფეისბუქზე" სტატუსს აქვეყნებს. ასია დარახჩიანი (Asya Darakchyan) დე ფაქტო ხელისუფლებისგან ბოდიშის მოხდას ითხოვს და საგანგებო შტაბს ცრუ ინფორმაციის გავრცელებაში ადანაშაულებს.

მისი თქმით, ბიძამისი არათუ ტაქსისტი არ არის (ინფიცირებული მამამაკაცი მოსკოვის მივლინებიდან დაბრუნებულ ტაქსისტად გამოაცხადეს), არამედ არც მანქანა ჰყავს და "წარმოდგენაც კი არ აქვს, როგორ იქოქება ის".
"როგორც არასწორად გადაუღეს ვიდეო ჩემს მანქანას, ასევე გადაიღონ თავიანთი მანქანები, სახე გამოაჩინონ და ბოდიში მოიხადონ, მერე კი ვიდეო ყველას გაუგზავნონ, ვისაც აცნობეს, რომ ვითომ ბიძაჩემია ინფიცირებული... ბიძაჩემს გუდაუთის საავადმყოფოში მხოლოდ გადასხმა გაუკეთეს და უკვე თავს კარგად გრძნობს, არც ტაქსისტია და მთელი იმ ხნის განმავლობაში, რაც ჩამოვიდა მოსკოვიდან, ნათესავებიდან არავის დაკონტაქტებია. ეკონტაქტა ცოლს, მაგრამ ცოლს არაფერი აღმოაჩნდა.
სირცხვილია, ბოლოს და ბოლოს! კორონავირუსი და ყველა სხვა დაავადება გაივლის, სირცხვილს კი ვერ ჩამოირეცხავთ, მთელი მსოფლიოდან გვირეკავენ, ასეთი რა დავაშავეთ?", - წერს ასია დარახჩიანი.