აშშ-ში მოღვაწე ქართველმა ექიმმა, მისისიპის უნივერსიტეტის პროფესორმა, ზურაბ გურულმა “TV პირველის” გადაცემაში “დღის ამბები დიანა ტრაპაიძესთან ერთად” კორონავირუსზე ისაუბრა.

გურული ფიქრობს, რომ აპრილის ბოლოსა და მაისის შუა რიცხვებში ვითარება კონტროლს დაექვემდებარება, ახალი შემთხვევები ბევრად უფრო ნაკლები იქნება და მაისის ბოლოსკენ მსოფლიოს შესაძლებლობა ექნება ნელ-ნელა დაიწყოს კარების გაღება და ურთიერთობების აღდგენა.

“ჩემი ოპტიმისტური განწყობა ემყარება იმას, რომ თუნდაც ნიუ-იორკში უკვე მიაღწია პიკს (კორონავირუსის შემთხვევების რაოდენობამ), იტალიაშიც მიაღწია პიკს, გაჩერდა და კლება დაიწყო. ახლა ჩემს შტატს – მისისიპის შტატს ვუყურებ, ასევე, ლუიზიანას, სადაც ნიუ ორლეანში, დაახლოებით, იგივე სიტუაციაა, რაც ნიუ-იორკში და იქაც ნელ-ნელა ბრტყელდება მრუდი, რომელიც დიდი სისწრაფით მიიწევდა მაღლა და მგონია, რომ აპრილის ბოლოდან, მაისის შუა რიცხვებში ეს უკვე კონტროლს დაექვემდებარება, ახალი შემთხვევები ბევრად უფრო ნაკლები იქნება და სადღაც, მაისის ბოლომდე, შესაძლებელი იქნება, მსოფლიომ ნელ-ნელა კარების გაღება და ურთიერთობების, მოგზაურობის აღდგენა დაიწყოს”, – მიიჩნევს პროფესორი.