სამეგრელოში სენაკისა და ზუგდიდის აგრარული ბაზრები დაიხურა. ფაქტმა მოვაჭრეების პროტესტი გამოიწვია. მათი თქმით, ისინი ბაზრის დახურვის შესახებ ინფორმირებულები არ იყვნენ, შესაბამისად, აღდგომისთვის პროდუქტი წინასწარ შეიძინეს, რომელიც შესაძლოა, გაუფჭდეს.

მათი თქმით, ზარალი ათასობით ლარია.

მოვაჭრეები ამბობენ, რომ მათ მოკროსაფინანსოების ვალი აქვთ და მათი შემოსავალიც სწორედ ბაზარიდან შემოსული თანხაა.

სამეგრელოს სახელმწიფო რწმუნებული ალექსანდრე მოწერელია ამბობს, რომ ზუგდიდის ბაზრის დახურვას არ აპირებდნენ, თუმცა გადაწყვეტილება მას შემდეგ მიიღეს, რაც მოვაჭრეებმა რეკომენდაციები არ გაითვალისწინეს.

"სენაკის და ზუგდიდის ბაზრები დახურულია, რაც შეეხება ფოთს, იქ ფაქტიურად ფუნქციონირებს ერთი დიდი სუპერმარკეტი უნივერსამი და ამავე დროს მინდა ავღნიშნო ის, რომ ფოთის ბაზარმა ძალიან სწრაფად შეძლო ყველა იმ რეკომენდაციის დაცვა, რომელიც ითვალისწინებს, როგორც ნაღდ ფულთან კავშირს ასევე დისტანციის დაცვას, ეს იქნება კარგი მაგალითი სხვა ბაზრებისთვის. ჩვენ არ ვაპირებდით ზუგდიდის ბაზრის დახურვას, თუმცა მათ ვერ მოახერხეს რეკომენდაციების დაცვა, რაც შეეხება სენაკს, იქ უფრო რთულად იყო საქმე და ამიტომაც გადაწყდა დახურვა საბჭოს სხდომაზევე", - განაცხადა სახელმწიფო რწმუნებულმა.

მოწერელია ამბობს, რომ სამეგრელოში ორი ინფიცირებულია, რომლებიც ზუგდიდის ინფექციურ საავადმყოფოშიარიან მოთავსებულები.

რწმუნებული ამბობს, რომ ინფიცირებულებთან კონტაქტში მყოფ სამ პირს ახალი კორონავირუსი არ დაუდასტურდა.

"მათი ანალიზები გაიგზავნება ხელახლა. ძალიან ბევრი კავშირი უფიქსირდება, როგორც პირველად ინფიცირებულს, ასევე ამ სამ ადამიანს, ამდენად რისკი მაღალია და ამიტომაც გადამოწმებას საჭიროებს. ასევე გამოვლენილია კონტაქტის-კონტაქტები".