იმ ფონზე, რომ მთელი მსოფლიო კორონავირუსთან ბრძოლაშია ჩაბმული, დედამიწის ზოგიერთ წერტილში ამ დრომდე სასტიკი საბრძოლო შეტაკებები მიმდინარეობს, რომელთა შესახებ საინტერესო ინფორმაციები შეზღუდულად ვრცელდება.

ლიბიაში საბრძოლო მოქმედებების შეწყვეტის გადაწყვეტილება მიიღეს 21 მარტს მას შემდეგ, რაც კოვიდ 19-ის ინფექციის გავრცელება ძალზე მასშტაბური გახდა. მიუხედავად ზემოხსენებული შეთანხმებისა, რუსი მებრძოლები, რომლებიც კრემლის ხელისუფლების პოლიტიკის მთავარ მამოძრავებელ ძალას წარმოადგენენ, ცეცხლის შეწყვეტას მხოლოდ ერთი კუთხიდან განიხილავენ- მსოფლიო პანდემიის ფონზეც კი აქტიურად მოქმედებენ რუსი დაქირავებული სამხედროები უკრაინის, სირიისა და ლიბიის მიმდინარე კონფლიქტებში.

უკრაინული საინფორმაციო სააგენტოების ინფორმაციით, თურქეთის შეიარაღებულმა ძალებმა სარაკეტო დარტყმა განახორციელეს ქალაქ სირტში ლიბიის ცენტრალური ხელისუფლების წინააღმდეგ ამბოხებული გენერალი ჰაფთარის ძალებზე. თავდასხმა განხორციელდა უპილოტო საფრენი აპარატების მიერ მართვადი რაკეტების გამოყენებით სამხედრო კოლონაზე, რა დროსაც ვაგნერის დანაყოფის 20-მდე რუსი სამხედრო იქნა ნეიტრალიზებული. გავრცელებული ინფორმაციით, უპილოტო დამრტყმელი აპარატის მიერ განხორციელებული შეტევის შედეგად 7 სატვირთოში მყოფ სამხედროებთან ერთად განადგურებულია დიდი რაოდენობით საბრძოლო ამუნიცია, რომელიც რუს მებრძოლებს გადაჰქონდათ ამბოხებული გენერლის საჯარისო შენაერთებისთვის.