საქართველოში COVID-19-ით პირველი პაციენტი გარდაიცვალა. 79 წლის ქალი ბოლნისის მუნიციპალიტეტიდან თბილისში მძიმე მდგომარეობით პირველ საუნივერსიტეტო კლინიკაში 31 მარტს შეიყვანეს .

როგორც გაირკვა, ქვემო ქალი ბოლნისის ერთ-ერთი სოფლის კლასტერს მიეკუთვნება, სადაც კორონავირუსის 5 შემთხვევაა დადასტურებული.

დაავადებათა კონტროლის ეროვნული ცენტრის ხელმძღვანელის თქმით, გარდაცვლილ ქალს რელიგიურ დღესასწაულზე კონტაქტი ჰქონდა პირთან, რომელიც სარიტუალო სუფრაზე რუსეთ-აზერბაიჯანიდან საქართველოში შემოსულ პირებთან ერთად იმყოფებოდა:

“ეს ქალბატონი კონტაქტირებულია ადამიანებთან, რომლებიც შემოვიდნენ რუსეთ-აზერბაიჯანიდან საქართველოში და ამ სოფელში ერთ-ერთ სარიტუალო სუფრაზე გახლდნენ. შედგომ, რელიგიური დღსასწული მიმიდნარეობდა ამ პერიოდში და აქედან ერთ-ერთმა გადასდო ამ ქალბატონს, რომელიც არის ნათესავი ინფიცირებულის. ჯაჭვი ინფექციის განვითარებისა სრულად ცნობილია. ამ კლასტერში ჩვენ გვყავს 5 დაინფიცირებული ადამიანი”- განაცხადა ამირან გამყრელიძემ.

მისი თქმით, ქალს თანდართული მძიმე დაავადებები ჰქონდა, მათ შორის, დილატაციური კრდიომიოპატია, გულის უკმარისობა მეოთხე ხარისხის, არტერიული ჰიპერტენზია მე-3, ზომიერი პულმონური ჰიპერტენზია, აორტის სარქვლის ნაკლოვანება, სამკარიანი სარქვლის არარევმატიული ნაკლოვანება და კახექსია.

"ძირითადი დიაგნოზი აქ გახლავთ ახალი კორონავირუსით გამოწვეული დაავადება COVID-19 და მწვავე პნევმონია. გართულებები გახლავთ, მოზრდილთა რესპირაციული დისტრეს სინდრომი, სეფსისი, სეპტიური შოკი, სპონტანური პნევმოტორაქსი, სუნთქვის მწვავე უკმარისობა, გულ-სისხლძარღვთა მწვავე უმარისობა, გულის მწვავე უკმარისობა” - თქვა გამყრელიძემ.