რუსეთი ფრენებს აჩერებს და საზღვარგარეთ დარჩენილი 35000-მდე მოქალაქის დაბრუნებას არ აპირებს

COVID-19 - 13:30, 04 Apr, 2020

668

4 აპრილიდან რუსეთმა ყველა საერთაშორისო ავაირეისის განხორციელება შეწყვიტა. ის ასევე არ აპირებს საზღვარგარეთ მყოფი ტურისტებისა და რუსეთის მოქალაქეების სამშობლოში დაბრუნებას. კორონავირუსის გავრცელების პრევენციის ოპერატიული შტაბი აცხადებს, რომ ეს კეთდება რუსეთის მოქალაქეთა ჯანმრთელობის დაცვისა და კორონავირუსის გავრცელების ახალი ტალღის თავიდან ასაცილებლად.

ამჟამად, რუსეთის შსს-ს მონაცემებით საზღვარგარეთ 35 ათასამდე რუსი ტურისტია, რომლებიც სამშობლოში დაბრუნებას ვერ ახერხებენ. ეს ადამიანები დამოუკიდებლად მოგზაურობდნენ, რადგან "როსტურიზმის" მონაცემებით, ყველა ორგანიზებული ჯგუფი, რომელიც საზღვარგარეთ იმყოფებოიდა დაბრუნდა.

საზღვარგარეთ დარჩენილებს რუსეთი ყველა სახის დოკუმენტაციის ვადას ავტომატურად უგრძელებს, ასევე, ვისაც საკუთარი ანგარიში აქვს დაფიქსირებული, გარკვეული რაოდენობის თანხასაც ჩაურიცხავს. მსგავსი შინაარსის შეტყობინებები საზღვარგარეთ მყოფებმა უკვე მიიღეს, სადაც მათ საბანკო რეკვიზიტების გაგზავნას სთხოვდნენ, თუმცა ბევრმა მათგანმა ეს თაღლითობად ჩათვალა და შეტყობინებას იგნორირება გაუკეთა. ამ დროს, 1 აპრილიდან იმ პირებისთვის, ვინც სახელმწიფო სამსახურებს საკუთარი რეკვიზიტები მისცა, გარკვეული თანხების ჩარიცხვა უკვე დაიწყო.

რუსეთის მოქალქაეების განსაკუთრებით დიდი რაოდენობა ტაილანდშია - 20000, მათ სახელმწიფომ პანდემიის დასრულებამდე ადგილზე დარჩენა ურჩია. ტაილანდში ამ დროისთვის კორონავირუსით 1978 დაავადებული და 19 გარდაცვლილია.