ჩინეთმა კორონავირუსის წინააღმდეგ ბრძოლაში ახალ მეთოდს მიაკვლია. ჩინელი მედიკოსები და ეპიდემიოლოგები კოვიდ 19-ით ინფიცირებული პაციენტების სამკურნალოდ უკვე აქტიურად იყენებენ დათვის ნაღვლის მჟავას. აღნიშნულმა ფაქტმა დიდი ვნებათაღელვა გამოიწვია ცხოველთა დამცველებს შორის. მათი თქმით, იზრდება საშიშროება იმისა, რომ ზემოხსენებულმა მოვლენამ ხელი შეუწყოს არალეგალურ პროცეს გარეული ცხოველების ვაჭრობაში.

ჩინეთის ჯანმრთელობის ეროვნულმა კომისიამ მარტში გამოსცა მითითებები, რომელიც რეკომენდაციას უწევს კორონავირუსით კრიტიკულად დაავადებულ პაციენტებზე ისეთი ინექციის გამოყენებას, რომელიც შეიცავს დათვის ნაღვლის მჟავის ფხვნილს, თხის რქასა და სხვა სამკურნალო მცენარეულ საშუალებებს.

ჩინეთის პრეზიდენტი, სი ძინპინი პოპულარიზაციას უწევს ტრადიციულ ჩინურ მედიცინას- მისი თქმით, ეს არის „ჩინეთის ცივილიზაციის საგანძური“ და აცხადებს, რომ მას უნდა მიექცეს სათანადო ყურადღება და დაფასება.

დათვის ნაღვლის აქტიური ინგრედიენტი, ურსოდექსიქოლური მჟავა გამოიყენება ნაღვლის ბუშტისა და ღვიძლის დაავადებების სამკურნალოდ, თუმცა ამ დრომდე უცნობია მისი ეფექტურობა კოვიდ 19-ის ვირუსის წინააღმდეგ.

აზიის ცხოველთა დამცველი ორგანიზაციის სპიკერის, ბრაიან დეილის თქმით, საზოგადოება კორონავირუსთან საბრძოლველად არ უნდა დაეყრდნოს ისეთ გარეული ცხოველის „პროდუქტს“ , როგორიცაა დათვის ნაღველი. მისი თქმით, საეჭვოა აღნიშნული მკურნალობის მიდგომის ეფექტურობა, როდესაც მკვლელი ვირუსი სწორედ გარეული ცხოველებისგან გავრცელდა.