იმ ფონზე, რომ კორონავირუსი უკვე მთელ მსოფლიოს მოედო, მძიმე ვითარებაა საქართველოს მეზობელ ქვეყნებშიც, სადაც ინფიცირებულთა რაოდენობა უკვე რამდენიმე ათასს შეადგენს და ყოველდღიურად მასშტაბურად იზრდება. დღეიდან ოფიციალურად ამოქმედდა მკაცრი საკარანტინო წესები სომხეთში, სადაც კორონავირუსით ინფიცირებულთა რაოდენობა უკვე 532-ს , ხოლო გარდაცვლილთა რიცხვი კი 3-ს შეადგენს.

ურთულესი მდგომარეობაა აგრეთვე თურქეთშიც, სადაც კორონავირუსით დაავადებულთა რაოდენობა 11 000-მდეა, ფატალური შემთხვევების რიცხვი კი 168-ს შეადგენს. პრეზიდენტი ერდოღანის გადაწყვეტილებით, შეიქმნა სოლიდარობის ფონდი, სადაც თავისი 7 თვის ხელფასი უკვე გადარიცხა. მისი თქმით, აღნიშნული ქმედება გაიმეორეს მთავრობის კაბინეთის წევრებმაც და დეპუტატებმაც. ზემოხსენებულ ფონდში უკვე 5 მილიონზე მეტი ლირაა აკუმულირებული. ერდოღანის გადაწყვეტილებით ეს თანხა კოვიდ 19-ის ვირუსით დაზარალებულ თურქ მოქალაქეებს მოხმარდებათ.

შედარებით მსუბუქი მდგომარეობაა კორონავირუსის გავრცელების მხრივ აზერბაიჯანში, სადაც ინფიცირების 273 შემთხვევაა, რომელთაგან 4 სასიკვდილო აღმოჩნდა. აგრეთვე დღითიდღე იზრდება რუსეთშიც დაავადებულთა რიცხვიც- უკანასკნელი ინფორმაციით 2337 ადამიანი დაავადდა კოვიდ 19-ის ინფექციით, ხოლო 17 კი გარდაიცვალა. 1 დღე-ღამის მანძილზე 501 ახალი შემთხვევა აღინიშნა.