"გთხოვთ ახლავე მოდით და დაგვეხმარეთ ნიუ-იორკში... კორონავირუსთან საბრძოლველად დამატებით მილიონამდე მედიკოსი გვჭირდება"- ნიუ-იორკის გუბერნატორი

მსოფლიო - 13:48, 31 Mar, 2020

838

ნიუ-იორკის გუბერნატორმა გაავრცელა მიმართვა მოხალისე მედპერსონალისთვის, რომელთაც დახმარებას სთხოვს იმ ფონზე, რომ შტატში შემაშფოთებელი რაოდენობით იზრდება ინფიცირებულთა რიცხვი. მისი თქმით, დაავადებული პაციენტების რაოდენობა იმდენად დიდია, რომ მათ სამკურნალოდ არსებულ მედიკოსთა რაოდენობა საკმარისი არაა.

ნიუ-იორკის ჯანდაცვის უწყების წარმომადგენელთა თქმით, კორონავირუსის პიკი ჯერ კიდევ წინაა და და ის რაც ამჟამად ხდება შტატში მხოლოდამხოლოდ დასაწყისია.

„გთხოვთ ახლავე მოდით და დაგვეხმარეთ ნიუ-იორკში“ - განაცხადა გუბერნატორმა ენდრიუ კუომომ მას შემდეგ, რაც გარდაცვლილთა რაოდენობა ერთ დღეში 250-ით გაიზარდა, რომლის ფონზეც საერთო რაოდენობა ფატალური შემთხვევებისა უკვე 1200-ს აჭარბებს. მისი თქმით, დამატებით მილიონამდე ჯანდაცვის მუშაკია საჭირო კრიზისის შესაკავებლად.

სანამ ნიუ-იორკის გუბერნატორის ოფიციალური მიმართვა გავრცელდებოდა, ყოფილი მედიკოსები დაუბრუნდნენ თავიანთ პროფესიას და მოხალისეობრივად ეხმარებიან ჯანდაცვის უწყებას- 80 000-მდე ყოფილი ექთანი, ექიმი და ჯანდაცვის უწყების სხვა თანამშრომელი სრულიად უსასყიდლოდ ჩაერთო კორონავირუსთან ბრძოლაში.

ნიუ-იორკის სანაპიროებთან ჩამოდგა აგრეთვე ე.წ გემ-ჰოსპიტალი, რომლის მიზანი იქნება დამატებითი დახმარება გაუწიონ შტატის ჯანდაცვის უწყებას. საზღვაო ფლოტის აღნიშნულ ხომალდზე განთავსებულია 1000-მდე საწოლი, რომელიც მოემსახურება დაინფიცირებული პაციენტების მკურნალობას. აღნიშნული ფაქტი 2001 წლის 11 სექტემბრის ტერაქტის შემდეგ ნიუ-იორკში არ დაფიქსირებულა.

შეგახსენებთ, რომ კორონავირუსის მთავარ ეპიცენტრს დღეს მსოფლიოში აშშ წარმოადგენს, სადაც ინფიცირებულთა რაოდენობა 164 359, ხოლო გარდაცვლილთა რაოდენობა კი 3173-ია.