დაპაუზებული დედამიწა - COVID-19-ით გამოწვეული ეკონომიკური კრიზისის დაძლევას ტრილიონობით აშშ დოლარი დასჭირდება

მსოფლიო - 14:20, 30 Mar, 2020

2925

დედამიწაზე ცხოვრება გაიყინა. ნორმალურ მდგომარეობამდე დაბრუნება სავარაუდოდ შესაძლებელი იქნება, თუმცა ეს საკმაოდ ძვირი დაჯდება. საბოლოო ანგარიშს COVID-19 მსოფლიოს რამდენიმე თვეში წარუდგენს, თუმცა ექსპერტებმა მსოფლიოს ეკონომიკის რეაბილიტაციის სავარაუდო თანხა უკვე დაითვალეს და ის ტრილიონობით აშშ-ს დოლარს უტოლდება.

ევროპასა და აშშ-ში პანდემიას ჯერ პიკამდე არ მიუღწევია და მის ხანგრძლივობაზე იქნება დამოკიდებული, თუ რამდენად გაღარიბდებიან ამ ქვეყნის მაცხოვრებლები. ექსპერტები კარანტინის გაგრძელებას 2-3 კვირიდან 3-4 თვემდე ვარაუდობენ.

თანხები მართლაც გიგანტური და შემაშინებელია. აშშ-მ უკვე დაამტკიცა ანტიკრიზისული პაკეტი და ის 2 ტრილიონ დოლარს შეადგენს. ევროპა ჯერ ითვლის, თუმცა რამდენიმე ტრილიონით მეტ თანხას ვარაუდობს. საერთო ჯამში "დიდი ოცეულის" ქვეყნებმა უკვე განაცხადეს, რომ პირებენ დაახლოებით 5 ტრილიონ დოლარს დახარჯავენ ეკონომიკის რეაბილიტაციისათვის. ეს მსოფლიო ეკონომიკის წლიური ბრუნვის 6%-ია.

წინა კრიზისებისგან განსხვავებით, აქ საუბარია არა ახალი თანხების მოძიებაზე, არამედ არსებული ფულის გადამისამართებაზე ამ მიმართულებით. საუბარია ასევე იმაზე, რომ უფრო მდიდრებმი უნდა დაეხმარონ იმათ, ვისაც უჭირს.

"უკვე ცხადია, რომ მსოფლიო რეცესიის ჭაობში ეფლობა. მსოფლიომ თავიდან უნდა აიცილოს გაბანკროტებისა და სამუშაო ადგილების დაკარგვის ტალღა, რაც ემუქრება არა მარტო ეკონომიკას, არამედ საზოგადოებრივ თანხმობასაც," - აცხადებენ მსოფლიოს სავალუტო ფონდში.