საგანგებო მიმართვა ჩემს მორწმუნე პაციენტებს

საგანგებო მიმართვა ჩემს მორწმუნე პაციენტებს - ექიმი ჯაბა ზარქუა

COVID-19 - 17:59, 22 Mar, 2020

1365

დადგა ის დრო, როდესაც ჩემს მორწმუნე პაციენტებს მინდა კვლავ მოგაწვდინოთ ჩემი ხმა და გირჩიოთ: შეიკავეთ თავი სოციალური კონტაქტებისგან და ილოცეთ სახლში - ამის შესახებ ქართველმა ექიმმა ჯაბა ზარქუამ სოციალურ ქსელში დაწერა. ზარქუამ მორწმუნეებს მოუწოდა, გაუფრთხილდნენ საკუთარ და სხვის ჯანმრთელობას.

"საგანგებო მიმართვა ჩემს მორწმუნე პაციენტებს, რომელთაც მანდეს თავიანთი ჯანმრთელობის პრობლემების მართვა და ითვალისწინებენ ჩემს რჩევებს!
ხომ გახსოვთ, რამდენჯერ გვქონია შემთხვევა ჩვენი პროფესიული ურთიერთობის დროს, როცა ერთად გაგვირჩევია თქვენი დაავადებიდან გამომდინარე სხვადასხვა სარიტუალო წესების უსაფრთხოება და ჩემგან მყარი სამედიცინო არგუმენტების მოსმენის შემდეგ, თქვენს სულიერ მოძღვრებთან ერთად, ამ წესების დარღვევის გადაწყვეტილებაც მიგვიღია? განა ეს თქვენი რწმენის თავისუფლებაში ჩარევა იყო მაშინ? ცხადია, არა, რადგან ექიმმა თქვენი ხორცის ჯანმრთელობაზე უნდა იზრუნოს, ხოლო მოძღვარმა - სულის. ერთმანეთს ხელს არასდროს ვუშლიდით. ახლაც ასე მინდა მოხდეს.
დადგა ის დრო, როდესაც ჩემს მორწმუნე პაციენტებს მინდა კვლავ მოგაწვდინოთ ჩემი ხმა და გირჩიოთ: შეიკავეთ თავი სოციალური კონტაქტებისგან და ილოცეთ სახლში.
ამ რჩევის მოსაცემად ორი არგუმენტი მაქვს:
1. თქვენივე ჯანმრთელობა - სხვადასხვა ქრონიკული გასტროენტეროლოგიური და ჰეპატოლოგიური პრობლემების არსებობამ შეიძლება დაამძიმოს კორონავირუსის ბუნებრივი მიმდინარეობა, რაზეც დაუღალავად ვცდილობ ინფორმაციების გავრცელებას.
2. სხვისი ჯანმრთელობა - შეიძლება თქვენს შემთხვევაში კორონავირუსულმა ინფექციამ სერიოზული ჯანმრთელობის პრობლემები არ გამოიწვიოს ან საერთოდაც უსიმპტომოდ ჩაიაროს, მაგრამ სხვა დააინფიციროთ და ამ სხვასთან კი დაავადება ლეტალურად დასრულდეს.
ორივე არგუმენტი საკმარისია ჩემთვის, რიგითი ექიმისთვის, რომ თავს მივცე ამის ხმამაღლა თქმის უფლება, რადგან მჯერა რომ აბსოლუტურად ყველა თქვენგანი კეთილი ზრახვებითაა განმსჭვალული და მხოლოდ ინფორმაციის ნაკლებობის გამო შეიძლება გამოუსწორებელი ზიანი მიაყენოს საკუთარ თავს ან სხვას. პოლიტიკური კონიუქტურისგან თავისუფალი სამედიცინო ინფორმაციის მოწოდება თქვენი ექიმის საქმეა ამ დროს. დიახ, დღეს კი სახლში ლოცვის საჭიროება ცალსახად სამედიცინო საკითხია და არა - რელიგიური, წინააღმდეგ შემთხვევაში თავს მსგავსი კადნიერების უფლებას არ მივცემდი, როგორც აქამდე არ მიმიცია არასდროს ცხოვრებაში.
ჯანმრთელობას გისურვებთ და კიდევ ერთხელ გთხოვთ ილოცოთ სახლში, რადგან ღმერთი სახლშიც შემოაღწევს, ვირუსი - ვერა.
ჯაბა ზარქუა, გასტროენტეროლოგი/ჰეპატოლოგი, 22/03/2020.
#ილოცესახლში
#დარჩისახლში", - წერს ჯაბა ზარქუა.