BBC-ის ინფორმაციით, აშშ-ს შტატ ნიუ-ჯერსიში კორონავირუსით ერთი ოჯახის 4 წევრი გარდაიცვალა, მათი სამი ნათესავი კი ამ დრომდე საავადმყოფოშია მოთავსებული. გავრცელებული ინფორმაციით, ოჯახის 20-მდე ახლობელი, რომლებსაც მათთან უახლოესი დღეების მანძილზე კავშირი ჰქონდათ, ამჟამად იმყოფება თვითიზოლაციაში და ვირუსთან დაკავშირებით ელოდება ტესტის გამოკვლევის შედეგებს.

ბრიტანული მედიის ინფორმაციით ცნობილია გარდაცვლილთა ვინაობა- კორონავირუსით დაიღუპნენ გრეის ფუსკო და მისი შვილები- რიტა ფუსკო ჯექსონი, კარმინ ფუსკო და ვინსენტ ფუსკო.

კათოლიკური სკოლის მასწავლებელი, 55 წლის რიტა ფუსკო პარასკევს გარდაიცვალა. ჯანდაცვის საკითხებში შტატის კომისრის განცხადებით, ქალს კორონავირუსით დაავადებამდე ჯანმრთელობის რაიმე პათოლოგიური და ქრონიკული პრობლემები არ აღენიშნებოდა. დედა, გრეის ფუსკო და მისი შვილი, კარმინი ვირუსმა ოთხშაბათს იმსხვერპლა- პნეუმონიის უმძიმესი ნიშნები ჰქონდათ, რის გამოც ექიმებმა მათი გადარჩენა ვერ შეძლეს. იმავე საავადმყოფოში, სადაც გრეისი „დანებდა სიკვდილს“ გარდაიცვალა მისი კიდევ ერთი შვილი ვინსენტიც.

ფუსკოების ოჯახის წევრის, პარადისო ფოდერას თქმით, 19 ადამიანი, მათ შორის გრეისის 5 შვილი, რომლებიც დიდ საოჯახო შეკრებასა და სადილს დაესწრნენ, ამ დრომდე იმყოფებიან თვითიზოლაციაში და უკვე 1 კვირაზე მეტია, კორონავირუსის გამოკვლევის შედეგებს ელოდებიან.

აშშ-ში კორონავირუსისგან დაინფიცირებულთა რაოდენობა 19 774, ხოლო დაღუპულთა რიცხვი კი 275-ია.