98 წლის ჩინელი მეცნიერი და მისი 85 წლის მეუღლე კორონავირუსისგან განიკურნა. ამის შესახებ ინფორმაციას DAILYMAIL-ი ავრცელებს. გამოცემის თქმით, ისინი 18 დღიანი მკურნალობის შემდეგ ზეიჩანის საავადმყოფოდან გაწერეს. მეცნიერი ჰან ტიანქი ცნობილი ასტრონომია, რომელიც თავისი პროფესიით 63 წლის განმავლობაში მუშაობდა ჩინეთში.

ჰანსა და მის ცოლს კორონავირუსი თებერვლის შუა რიცხვებში დაუდგინდათ. მას შემდეგ რაც მათი მდგომარეობა კრიტიკულად დამძიმდა 24 თებერვალს, ისინი სასწრაფოდ საავადმყოფოში გადაიყვანეს. უმძიმესი მდგომარეობის გამო საჭირო გახდა მათი ინტენსიური მკურნალობის პალატაში გადაყვანა- მათ პნეუმონია რთულ ფორმებში აღენიშნებოდათ.

ჩინელი ცოლ-ქმრის შვილიშვილმა სოციალურ ქსელში გამოაქვეყნა პოსტი, რომელშიც იგი ითხოვდა გამოჯანმრთელებული პაციენტებისგან დახმარებას- მათ თავიანთი სისხლი უნდა ჩაებარებინათ იმ საავადმყოფოში, სადაც ჰანი და მისი მეუღლე იყვნენ მოთავსებულნი.

ჩინელი მეცნიერები თვლიან, რომ განკურნებული ადამიანის მიერ სისხლის გაცემა კორონავირუსით დაავადებულთათვის სამკურნალოდ ერთ-ერთი საუკეთესო თერაპიული საშუალებაა. ერთ-ერთი ვერსიით, გაჯანსაღებული ადამიანის სისხლში არსებული პროტეინები როდესაც ხვდება დაავადებული პაციენტის ორგანიზმში, წარმოიქმნება ე.წ ანტისხეულები, რომლებიც ხელს უწყობენ დასნეულებული ორგანოების გამოჯანმრთელებას და ვირუსთან ბრძოლის პროცესს. ზოგიერთი ჩინური საავადმყოფოს ხელმძღვანელობა აცხადებს, რომ ისინი იყენბენ აღნიშნულ თერაპიას უკვე აქტიურად მხოლოდ თავიანთ პაციენტებზე.

ასაკოვანი ჩინელი ცოლ-ქმრის მდგომარეობა თანდათან უმჯობესდებოდა მიღებული მკურნალობის შემდეგ, თუმცა ამ დრომდე არ დასტურდება ის ფაქტი, რომ მათ გაჯანსაღებული პაციენტების სისხლით უმკურნალეს თუ არა.

მიუხედავად იმისა, რომ ჩინეთში მასშტაბურად გავრცელდა ვირუსი, რამაც 3213 ადამიანი იმსხვერპლა, აქ უკვე 75 %-ზე მეტი პაციენტებისა გამოჯანმრთელებულია- სულ 67 819 ადამიანი განკურნეს 80 880 შემთხვევიდან. ამ დროისთვის 9848 პაციენტი იმყოფება საავადმყოფოში, ხოლო მათგან 3226 კრიტიკულ მდგომარეობაშია.