ჩეხეთის მოქალაქეებს კორონავირუსი თავიანთ ქვეყანაში დაუდასტურდათ - "მთვრალი ალუბლის" განცხადება რელევანტურია

COVID-19 - 11:35, 16 Mar, 2020

1514

"ჩეხეთში COVID-19 დაუდასტურდა ჩეხეთის მოქალაქეს, რომელსაც ჰქონდა გუდაურში მოგზაურობის ისტორია 4-9 მარტს"- ამის შესახებ ინფორმაციას დაავადებათა კონტროლისა და საზოგადოებრივი ჯანმრთელობის ეროვნული ცენტრის (NCDC), საზოგადოებრივი ჯანმრთელობის რისკებზე მზადყოფნისა და რეაგირების სამმართველოს უფროსი, ანა კასრაძე ავრცელებს.
როგორც კასრაძე სოციალურ ქსელში წერს, ჩეხეთის მოქალაქე მოგზაურობდა 6 კაციან ტურისტულ ჯგუფთან ერთად, მათგან კიდევ ერთს, სლოვაკეთის მოქალაქეს, ასევე საკუთარ ქვეყანაში დაუდასტურდა COVID-19.

"გუდაურთან დაკავშირებით:
ჩეხეთში COVID-19 დაუდასტურდა ჩეხეთის მოქალაქეს, რომელსაც ჰქონდა გუდაურში მოგზაურობის ისტორია 4-9 მარტს. იგი მოგზაურობდა 6 კაციან ტურისტულ ჯგუფთან ერთად, მათგან კიდევ ერთს, სლოვაკეთის მოქალაქეს, ასევე საკუთარ ქვეყანაში დაუდასტურდა COVID-19. დადასტურების შემდეგ მათ შეგვატყობინეს ამის შესახებ, (რაც მათი მხრიდან შეგნებული საქციელია) რის შემდეგაც დაიწყო იმ ადგილების მოძიება სადაც ტურისტები იმყოფებოდნენ და ჰქონდათ კონტაქტები. გამომდინარე აქედან, ზოგიერთ დაწესებულებას მიეცა თვითიზოლაციაზე რეკომენდაცია.❗️ინფიცირებული ტურისტები ჩვენ არ გაგვიბრუნებია უკან❗️საქართველოში მათ არ დადასტურებიათ COVID-19, რადგან მათ სიმპტომების შესახებ არ განუცხადებიათ არავისთვის" - წერს კასრაძე.
შეგახსენებთ, გუდაურში ერთ-ერთი პოპულარული რესტორანი "მთვრალი ალუბალი" "ფეისბუქზე" განცხადებას ავრცელებს და აღნიშნავს, რომ 4 მარტიდან რესტორანი ექვს ჩეხ ტურისტს მასპინძლოვბდა, საიდანაც სამს კორონავირუსი აღმოაჩნდა, აქედან გამომდინარე, რესტორანი მიმართავს ყველას, ვინც 4 მარტიდან დღემდე რესტორანში ყოფილა - კორონავირუსზე ტესტირება ჩაიტაროს.რესტორანი ამ დროისთვის დაკეტილია, ორი თანამშრომელი მაღალი ტემპერატურით ელოდება კატასტროფის ბრიგადას, ხოლო დანარჩენი თანამშრომლები თვითიზოლაციაში არიან.
როგორც განცხადებაშია აღნიშნული, ამის შესახებ დაავადებათა კონტროლის ცენტრიდან ზარის შემდეგ შეიტყვეს, როცა კორონავირუსით ინფიცირებულმა ტურისტებმა აღნიშნეს, რომ საქართველოში ყოფნის დროს ყოველდღე დადიოდნენ რესტორან "მთვრალ ალუბალში".