იტალიაში მცხივრები ქართველი ემიგრანტი, ხათუნა შარაძე, სოციალური ქსელის საშუალებით ქართველებს მიმართავს.

შარაძე წერს, რომ იგი კარანტინის ზონაშია და მისთვის პურის საყიდლად წასვლაც კი დიდი საფრთხის შემცველია.

"ჩემებო, ჩემო ფეისბუქ მეგობრებო, ჩემს და ჩვენს საქართველოში მცხოვრებო ქართველებო, თქვენ წარმოდგენაც არ გაქვთ, რა შეძლო საქართველომ, რას გაართვა თავი და რას გაუმკლავდა.

დამერწმუნეთ, რომ კარანტინის ზონაში მყოფი ადამიანის გადმოსახედიდან ზღაპრის ჟანრია, ის ფაქტი, რომ 24 საათის მანძილზე საქართველოში ვირუსი არ დაფიქსირდა, ის რომ პირველი პაციენტი გამოჯანმრთელდა და რომ გყავთ ის ადამიანები, ვინც ეს დაუჯერებელი ამბავი შეძლო.

გთხოვთ, გვერდზე გადადეთ თქვენი პოლიტიკური გემოვნება და შეფასებები და გაიაზრეთ რას გაუმკლავდა ჩვენი ქვეყანა.

დღეს მსოფლიო აბსოლუტურად სხვა რეალობაში ცხოვრობს და ის რაც ვერ შეძლო ძლიერმა სახელმწიფოებმა, შეძლო ჩვენმა პატარა საქართველომ.

მე, კარანტინის ზონაში ვცხოვრობ და ეს ნიშნავს, რომ პურის ყიდვაც საფრთხის შემცველია, რადგან ქუჩაში სამართალდამცავები პატრულირებენ, რადგან ნებისმიერ წამს შეიძლება გახდე შემდეგი და თქვენ, საქართველოს მოქალაქეებო, ეს ყველაფერი ემოციურ დონეზე შეგეხოთ.

ქედს ვიხრი ყველა იმ ადამიანის წინაშე, ვინც შეძლო პანდემიის ამ ხარისხით მართვა და მოქალაქეების დაცვა!!!

მიყვარხარ საქართველო!" - წერს ემიგრანტი.