მარაგები საკმარისია და ფასების ზრდა არ იგეგმება - მაღაზიათა ქსელების წარმომადგენლები

COVID-19 - 21:45, 14 Mar, 2020

897

მთავრობის ადმინისტრაციაში გამართული შეხვედრის შემდეგ საქართველოში არსებული მაღაზიათა ქსელების წარმომადგენლებმა კომენტარები გააკეთეს და განაცხადეს, რომ სურსათის მარაგი აქვთ და ამ კუთხით ქვეყანაში პრობლემა არ შეიქმნება.

მთავრობის ადმინისტრაციაში შეხვედრაზე გუდვილის, აგროჰაბის, ევროპროდუქტის, სმარტის, ნიკორას, სპარის და ორი ნაბიჯის გენერალური დირექტორები იმყოფებოდნენ.

" ნიკორას " გენერალური დირექტორი აცახდებს, რომ არც პროდუქტის, არც ნედლეულის დეფიციტის საფრთხე არ არსებობს. მისივე თქმით უსაფუძვლოა მღელვარებაც.

"წარმოიდგინეთ, რომ ახალი წლის წინა დღეებია. მაშინაც ამდენი ხალხია, მაშინაც შეიძლება დაინახოთ დროებით, რაღაც მომენტში ცარიელი თარო, მაგრამ ეს იმას არ ნიშნავს, რომ პროდუქტი არ არის. მარაგები საკმარისია, ვმუშაობთ დაძაბულ, მაგრამ ჩვეულებრივ რეჟიმში", - თქვა ირაკლი ბოქოლიშვილმა.

ორი ნაბიჯის გენერალური დირექტორის, გიორგი გიორბელიძეის თქმით, მიუხედავად იმისა, რომ ბოლო დღეებში მომხმარებელთა მატება შეინიშნება კომპანიას მარაგი საკმარისი აქვს.

"მღელვარების საფუძველი არ არსებობს. ბოლო ორი დღის მანძილზე გაზრდილია მომხმარებლის რაოდენობა, მაგრამ მარაგები ჩვენს კომპანიებში არის საკმარისზე მეტი", - ორი ნაბიჯის გენერალურმა დირექტორმა, გიორგი გიორბელიძემ.

გუდვილის გენერალური დირექტორის თქმით, მარაგები საკმარისზე მეტია და ნებისმიერი ტიპის მოთხოვნას და ნაკადს დააკმაყოფილებენ, თუმცა ამის საფუძველი არ არსებობს.

რაც შეეხება ფასების ზრდას, ქსელური მაღაზიების წარმომადგენლები ამბობენ, რომ ფასები არ შეუცვლიათ და უახლოეს პერიოდში არც აპირებენ.

"ეს მიმართულება არ განიხილება, პრაქტიკულად. ამის საფუძველი ამ მომენტში არ არსებობს, ბაზარზე ფასები არ არის გაზრდილი. ბოლო დღეების განმავლობაში, ისევე, როგორც სხვა ქსელებში, არ მომხდარა დიდ ასორტიმენტზე ფასების ზრდა. 35 000 დასახელების პროდუქტიდან რამდენიმეზე შეიძლება ხდებოდეს ფასის ცვლილება, თუმცა ეს არ ეხება იმ პროდუქტებს, რაზეც მოთხოვნა გაიზარდა. მეტიც, ბოლო დღეების და ბოლო კვირების განმავლობაში საერთოდ არ მომხდარა ამ პროდუქტებზე ფასის ცვლილება, აქციებიც არ შეგვიჩერებია", - თქვა გუდვილის გენერალურმა დირექტორმა, გიორგი ხაბაშვილმა.

ქსელური მარკეტების წარმომადგენლები ამბობენ, რომ ფასი არ გაიზრდება არც ლარის გაუფასურების გამო, რადგან სურსათი უკვე ნაყიდი აქვთ.

მათივე ინფორმაციით, მაღაზიები ჩვეულ რეჟიმში, "ცოტა უფრო გაზრდილი დატვირთვით" მუშაობენ.