კორონავირუსი მსოფლიოში. ესპანეთში COVID-19-ით გარდაცვალების შემთხვევების რაოდენობა თითქმის გაორმაგდა.

„როიტერის“ცნობით, ესპანეთში 12 მარტს გარდაცვლილთა რიცხვი 37-ით გაიზარდა და საერთო ჯამში 84 შეადგინა. გამოვლენილია ინფიცირების 1500 ახალი შემთხვევა.

იტალიის შემდეგ ესპანეთი კორონავირუსის შემთხვევების რაოდენობის მიხედვით ევროპაში მეორე ადგილზეა.

მთავრობის საგანგებო სხდომის შემდეგ, ესპანეთის ოთხ ქალაქში კარანტინი გამოცხადდა. კერძოდ, ჩაიკეტა ბარსელონადან ჩრდილოეთით, 49 კილომეტრში მდებარე სოფელ იგუალადას გარშემო მდებარე ოთხი ქალაქი.

შედარებით დამაიმედებელი ვითარებაა სამხრეთ კორეაში, სადაც ბოლო 24 საათში კორონავირუსისგან უფრო მეტი პაციენტი განიკურნა, ვიდრე დაინფიცირდა. საავადმყოფოებიდან უკვე 114 განკურნებული პაციენტი დაწერეს.

ამ დროისთვის არსებული მონაცემებით, სამხრეთ კორეაში ახალი ტიპის კორონავირუსით 66 ადამიანია დაღუპული.