პუტინი ტერეშკოვას შესწორებას დაეთანხმა - დუმამ მას 2024 წლის საპრეზიდენტო არჩევნებში მონაწილეობის ნება დართო

მსოფლიო - 17:36, 10 Mar, 2020

1374

რუსეთის დუმამ ე.წ. "ტერეშკოვას შესწორება" 380 ხმით მიიღო და ფაქტიურად დართო ნება ვლადიმირ პუტინს, 2024 წლის საპრეზიდენტო არჩევნებში მონაწილეობა მიიღოს.

დღეს პირველმა ქალმა კოსმონავტმა, რუსეთის დუმის დეპუტატმა ვალენტინა ტერეშკოვამ, რუსეთის პარლამენტის წინაშე დააყენა საკითხი, რომ კონსტიტუციაში მოხსნილიყო შეზღუდვა რუსეთის პრეზიდენტის თანამდებობის დაკავების რაოდენობასთან დაკავშირებით.

აღნიშნული საკითხის დასმის შემდეგ დუმაში შესვენება გამოცხადდა, ხოლო ადგილობრივი დროით 3 საათისთვის რუსეთის პარლამენტს თავად ვლადიმირ პუტინი ეწვია.

პუტინმა უარყო ტერეშკოვას წინადადება, რომ გაუქმებულიყო ერთი ადამიანის მიერ პრეზიდენტის პოსტის 2-ზე მეტი ვადით დაკავების შეზღუდვა, თუმცა, მოიწონა ის შესწორება, რომლის თანახმადაც, ახალი კონსტიტუციის მიღების შემდეგ, განულებული იქნება პრეზიდენტის პოსტზე ყოფნათა რიცხვი და მათი ათვლა პუტინისთვის 0-იდან იწყება.

"საკონსტიტუციო სასამართლომ გადაწყვიტოს, სწორია თუ არა ეს შესწორება," - განაცხადა რუსეთის პრეზიდენტმა.

ტერეშკოვას ფორმულირებამ ასეთი სახე მიიღო:

"შეზღუდვა - "ერთ ადამიანს არ აქვს პრეზიდენტის პოსტის ორზე მეტად დაკავების უფლება" იმოქმედებს ახალი კონსტიტუციის ძალაში შესვლამდე ამ ადამიანის მიერ აღნიშნული პოსტის დაკავების რაოდენობის გათვალისწინების გარეშე".

აღნიშნული შესწორება, ისევე როგორც სხვა საკონსტიტუციო ცვლილებები, 22 აპრილის რეფერენდუმზე უნდა იქნას მიღებული, ხოლო შემდეგ მისი კონსტიტუციასთან შესაბამისობის საკითხს რუსეთის საკონსტიტუციო სასამართლო განიხილავს.

ამ ორი ეტაპის გავლის შემდგომ, რაშიც ექსპერტები პრობლემას ვერ ხედავენ, პუტინს ექნება შესაძლებლობა 2024 წელსაც გახდეს რუსეთის პრეზიდენტი. იგი ამ დროს 72 წლის იქნება.