ვალენტინა ტერეშკოვა: პუტინმა უნდა მიიღოს მონაწილეობა 2024 წლის არჩევნებში, შევიტანოთ ცვლილებები კონსტიტუციაში

მსოფლიო - 15:59, 10 Mar, 2020

2080

10 მარტს, რუსეთის დუმა მეორე მოსმენით განიხილავს პუტინის მიერ წარდგენილ საკონსტიტუციო ცვლილებების პროექტს. განხილვა სენსაციური განცხადებებით დაიწყო.

ჯერ ვლადიმირ ჟირინოვსკიმ და "ედინაია როსიას" დეპუტატმა ალექსანდრე კარელინმა დააყენეს საკითხი, რომ საკონსტიტუციო ცვლილებებში ჩაიდოს რიგგარეშე არჩევნების დანიშვნის მუხლი, რადგან, მათი აზრით, "დუმის" უფლებამოსილებები იცვლება, რაც ახალი არჩევნების ჩატარების წინაპირობაა.

თუმცა ეს არ იყო ყველაზე სენსაციური განცხადება - პირველმა ქალმა კოსმონავტმა, რუსეთის დუმის დეპუტატმა ვალენტინა ტერეშკოვამ რუსეთის პარლამენტის წინაშე დააყენა საკითხი, რომ კონსტიტუციაში მოხსნილიყო შეზღუდვა რუსეთის პრეზიდენტის თანამდებობის დაკავების რაოდენობასთან დაკავშირებით, რაც ვლადიმირ პუტინს საშუალებას აძლებს 2024 წლის არჩევნებში კიდევ ერთხელ იყაროს კენჭი ამ პოსტზე.

"გთავაზობთ, მოვხსნათ შეზღუდვები პრეზიდენტად არჩევის რაოდენობის თაობაზე, ან ჩავწეროთ საკონსტიტუციო ცვლილებებში, რომ მოქმედ პრეზიდენტს, ახალი კონსტიტუციის ძალაში შესვლის შემდეგ შეუძლია უახლოეს არჩევნებში მონაწილეობის მიღება," - განაცხადა ტერეშკოვამ.

ტერეშკოვას განცხადებამ რუსეთის დუმის წევრები დააბნია და სპიკერმა ვიაჩესლავ ვოლოდინმა შესვენება გამოაცხადა.

"უნდა გავიაროთ კონსულტაციები პრეზიდენტთან და საპარლამენტო ფრაქციებთან," - განაცხადა მან.