15 დღიანი ტყვეობის შემდეგ ქართველი მეზღვაურები სამშობლოში ბრუნდებიან

საზოგადოება - 15:30, 10 Mar, 2020

765

საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოს განცხადებით, დღეს ბათუმის აეროპორტში მეკობრეთა ტყვეობიდან გამოხსნილ ქართველ მეზღვაურებს საზღვაო ტრანსპორტის სააგენტოს დირექტორი თამარ იოსელიანი და აჭარის ა.რ. ჯანდაცვის მინისტრი ზაალ მიქელაძე დახვდებიან.

მეზღვაურები 6 მარტს გაათავისუფლეს. ამ დღეების განმავლობაში მათ სრული სამდიცინო შემოწმება და სხვა საჭირო პროცედურები გაიარეს.
თამარ იოსელიანის განცხადებით, გემთმფლობელმა, Oceangold Tankers Inc-მა ყველა შესაბამისი ნაბჯი გადადგა მეზღვაურების ტყვეობიდან გამოსახსნელად და გამოავლინა კრიზის მართვის მაღალი უნარები, რამაც მნიშვნელოვნად დააჩქარა გათავისუფლების პროცესი. კომპანიის წარმომადგენლები თავად ჩამოიყვანენ მეზღვაურებს საქართველოში.
„აღვნიშნავთ, რომ გემთმფლობელთან ერთად პროცესში აქტიურად იყო ჩართული საქართველოს სახელმწიფო სტრუქტურები და შედეგის სწრაფად დადგომისათვის ყველა მხარემ კოორდინირებულად იმოქმედა", - აცხადებს საზღვაო ტრანსპორტის სააგენტოს დირექტორი.

შეგახსენებთ, რომ 9 მეზღვაური, მათ შორის 4 ქართველი, აფრიკის სანაპიროსთან 20 თებერვალს ლიბერიის დროშის ქვეშ მცურავ ტანკერზე ALPINE PENELOPE-ზე მეკობრეების თავდასხმის შედეგად იქნენ დატყვევებული.