,,არ ჩანს კარგად": შსს-მ ვიდეო კამერების ჩანაწერები ვერ გაშიფრა

,,არ ჩანს კარგად": შსს-მ ვიდეო კამერების ჩანაწერები ვერ გაშიფრა - თაროზე შემოდებული საქმე

საზოგადოება - 17:55, 03 Mar, 2020

984

ავჭალაში მომხდარი ქურდობიდან თითქმის ერთი თვის თავზე შინაგან საქმეთა სამინისტრომ საქმე ვერ გამოიძია. საქმე ეხება რაგბის სტადიონის მიმდებარე ტერიტორიაზე მომხდარ ფაქტს, სადაც 70 წელს გადაცილებულ ქალს გასაყიდი ნივთები მოპარეს. როგორც ძალოვან უწყებაში განმარტავენ გამოძიება ამ დრომდე ქურდობის მუხლით მიმდინმარეობს, თუმცა დაკავებული არავინ არ არის. დაზარალებული განმარტავს, რომ ქურდობის ფაქტიდან მალევე მან პოლიცია შემთხვევის ადგილზე გამოიძახა, ამოიღეს მიმდებარე ტერიტორიაზე დამონტაჟებული ვიდეო ჩანაწერებიც, თუმცა სამართალდამცველებმა კამერებიდან პირის იდენტიფიცირება ვერ შეძლეს. ამის მიუხედავად დაზარალებული ც.ს ამტკიცებს, რომ მიმდებარე ტერიტორიაზე, სადაც ქურდობა მოხდა, არა ერთი ვიდეო ჩამწერი აყენია და დამნაშავის ვინაობაც ძალიან კარგად ჩანს.

,,დააახლოებით 6 თებერვალი იყო, დღის მეორე ნახევარი, ის პერიოდი, რომ არ ბნელოდა . ზუსტად რამდენიმე წუთით დავტოვე ჩემი ნივთები რაგბის სტადიონთან ახლოს, იქვე გავედი საპირფარეშოში და მაქსიმუმ 3-4 წუთში რომ მოვედი არაფერი დამხვდა. ზურგზე აკიდებული ჩანთით, კარდაკარ, ოჯახ-ოჯახ დავდივარ, რომ პურის ფული ვიშოვო. გავა დღე, რომ ვერაფერს ვყიდი. გარდა ამისა, ეს ჩემთვის შემოსავლის ერთადერთი საარსებო წყაროა. რომ მივდივარ პოლიციაში ვერაფერს მეუბნებიან. ბოლოს მითხრეს, ვნახეთ კამერები, თუმცა კარგად არ ჩანს სახეო. აბა მე მოვეკალი ან უფრო მძიმე შედეგით დასრულებულიყო ეს ამბავი, ვერ დაინახავდნენ სახეს? თუმცა არ უნდათ გამოძიება, თაროზე შემოდეს ეს საქმეც. ფული მედო სიმწრით ნაშოვნი 150 ლარი და ჩემი პირადი ნივთები, სხვა დანარჩენზე აღარაფერს ვამბობ" - ამბობს დაზარალებული ტირილით.

შინაგან საქმეთა სამინისტროში განმარტავენ, რომ ფაქტზე გამოძიება სისხლის სამართლის კოდექსის 177 მუხლით მიმდინარეობს, რაც ქურდობას გულისხმობს. უწყებაში სხვა დამატებით დეტალებზე არ საუბრობენ.