ამ დროსითვის არსე3ბული ოფიციალური ინფორმაციით, ინფექციურ საავადმყოფოში 25 პაციენტია მოთავსებული, მათგან 11 ახალია.

ინფექციურ საავადმყოფოში აცხადებენ, რომ ყველა პაციენტი ახალგაზრდაა და მათი მდგომარეობა დამაკმაყოფილებელია.

„ჩაუტარდათ ლაბორატორიული და რენდგენოლოგიური კვლევები და მნიშვნელოვანი დარღვევები არ აღენიშნათ. დილით, 11 პაციენტთან ჩატარდება უკვე ხახის ნაცხის კვლევა.

რამდენიმე პირი იტალიიდანაა ჩამოსული. აღენიშნებათ ტემპერატურის მატება 37 გრადუსამდე, აქვთ მსუბუქად ყელის ტკივილი და მშრალი ხასიათის ხველა, სხვა სერიოზული ჩივილები კი არ უფიქსირდებათ. მათი მდგომარეობა დამაკმაყოფილებელია“, - აღნიშნავენ კლინიკაში.

როგორც ირკვევა, დამაკმაყოფილებელია იმ პაციენტების მდგომარეობა, ვისაც ახალი კორონავირუსული ინფექცია დაუდასტურდა.

„ამ ეტაპზე მათ გართულებები არ აქვთ და იმყოფებიან მონიტორინგისა და კვლევის ფაზაში, აღენიშნებათ დაბალი, 37,3 გრადუსამდე ტემპერატურა. კლინიკიდან გაწერა არ იგეგმება, თუმცა მათი მდგომარეობა დამაკმაყოფილებელია და გართულებებს არ ველოდებით“, - აცხადებენ ინფექციურ საავადმყოფოში.