თურქულმა საჰაერო ძალებმა ბაშარ ალ-ასადის ძალების კონტროლქვეშ არსებული სამხედრო აეროდრომი დაბომბეს ალეპოს პროვინციაში. ამის შესახებ ინფორმაციას ავრცელებენ არაბული, სირიული , აზერბაიჯანული და თურქული საინფორმაციო სააგენტოები.

აღნიშნული სამხედრო ობიექტი აქტიურად გამოიყენებოდა სირიის საჰაერო ძალების მიერ. აეროდრომზე შეტევა განახორციელეს თურქულმა უპილოტო საფრენმა აპარატებმა და შორსმსროლელმა საარტილერიო დანადგარებმა.

ალ-ნაირაბის სამხედრო აეროპორტს, რომელიც ქალაქი ალეპოს შემოგარენში მდებარეობს აქტიურად იყენებდა ასადის არმია - განლაგებული იყო საფრონტო ბომბდამშენები და ვერტმფრენები. ANADOLU NEWS-ის ინფორმაციით, სირიული საფრენი აპარატები სასწრაფოდ გადაიყვანეს კუვეირის სამხედრო აეროდრომზე, აღმოსავლეთ ალეპოში, რომელიც დაიბომბა გუშინ თურქული უპილოტო საფრენი საშუალებების მიერ.

ადგილობრივების თქმით, რეჟიმის მიერ საჰაერო ძალების გამოყენების სიხშირე შემცირდა მას შემდეგ, რაც ალ-ნაირაბის აეროდრომის ასაფრენი ბილიკი გამოუსადეგარი გახდა.

გავრცელდა ინფორმაცია აგრეთვე ირანელი სამხედროების დაღუპვის შესახებ, რომელთა შორის 4 მაღალი რანგის ოფიცერია. გუშინ დადასტურდა ინფორმაცია ირანელთა მხარდაჭერილი ლიბანური ჰესბოლას სამხედრო დაჯგუფების 9 მებრძოლის გარდაცვალების შესახებ, რომლებიც თურქულ უპილოტო საფრენი აპარატის დაბომბვებს შეეწირნენ.

ტვიტერის სოციალურ ქსელში ვრცელდება ფაქტები აგრეთვე ჰამას აეროპორტში განლაგებული ანტისაჰაერო სისტემების განადგურების შესახებ. შეტაკებების შემდეგ ცნობილი ხდება, რომ ქალაქი ჰაზარინი, თურქული არმიის კონტროლქვეშ გადავიდა.

აქტიურად მუშაობს აგრეთვე ჰან-სიბელის მიმართულებაზე თურქული უპილოტო დანადგარები, რომელთა აქტიური მოქმედების შედეგად განადგურებულია ასადის არმიის 10 ტანკი, 5 საბრძოლო მანქანა და 47 ჯარისკაცი. თურქეთის საინფორმაციო სააგენტოების ცნობით, დღის ბოლოს კიდევ ერთი რუსული წარმოების სირიული სუ-24 იქნა ჩამოგდებული- რამდენიმე საათით ადრე გავრცელდა ვიდეომასალა ტვიტერზე, სადაც ჩანს ალმოდებული სუ-24-ის ტიპის საფრონტო ბომბდამშენი.