თურქეთში კრემლის პროპაგანდისტული საინფორმაციო სააგენტო სპუტნიკის მთავარი რედაქტორი და სამი თანამშრომელი დააკავეს. მათი დაკავების მიზეზი გახდა სააგენტოს მიერ თურქეთის სამხრეთი პროვინციის, ჰატაის შესახებ 1939 წელს ჩატარებულ რეფერენდუმზე ინფორმაციის გავრცელება, რომელიც გამოცემის თქმით, სირიის ტერიტორიას წარმოადგენდა და იგი უკანონოდ მიისაკუთრა თურქეთმა.

სპუტნიკის მთავარი რედაქტორი, მაჰირ ბოსტეპე და სამი ადამიანი, რომლებიც მუშაობდნენ თურქეთში რუსული საინფორმაციო სააგენტოსთვის, სტამბოლსა და ანკარაში დააკავეს. თურქი სამართალდამცავების თქმით, მათ გამოაქვეყნეს პროპაგანდისტული სტატია სათაურით „ მოპარული პროვინცია: რატომ მიიღო თურქეთმა სირიის მხარე საფრანგეთისგან 80 წლის წინ“ .

შეგახსენებთ, რომ ჰათაის პროვინცია შედიოდა ოსმალეთის იმპერიის შემადგენლობაში I მსოფლიო ომამდე, თუმცა მას შემდეგ რაც თურქეთი დაამარცხეს ანტანტის ქვეყნებმა, იმპერია დაიშალა, ხოლო ზემოხსენებული რეგიონი კი 1923 წლის ლოზანოს ხელშეკრულების თანახმად, საფრანგეთის მანდატის ქვეშ სირიის შემადგენლობაში მოექცა. 1938 წელს ჩატარებული აღწერის შემდეგ ეროვნული ქვოტები დაწესდა ჰათაის ე.წ პარლამენტში.

აღწერით დადგინდა, რომ მოსახლეობის უდიდეს უმრავლესობას სწორედ თურქები შეადგენდნენ. ჰათაის პროვინციის პარლამენტში მანდატები ამგვარად განაწილდა: 22 ადგილი მიიღო თურქულმა ეთნიკურმა ჯგუფმა, 9 არაბულმა , 5 სომხურმა, 2-2 კი არაბი სუნიტებისა და არაბი ქრისტიანებისთვის განსაზღრეს.

1938 წელს წარმომადგენელთა პალატამ დამოუკიდებლად გამოაცხადა ჰათაის რესპუბლიკა. 1939 წელს საყოველთაო რეფერენდუმი ჩატარდა, რომლის მიხედვითაც მოსახლეობის უმრავლესობამ მხარი დაუჭირა ჰატაის რესპუბლიკის გაუქმებასა და თურქეთის შემადგენლობაში შესვლას.

აღნიშნული ფაქტის შემდეგ, არაბებმა და სომხებმა დატოვეს პროვინცია და საცხოვრებლად სირიაში გადავიდნენ. თურქეთის უკიდურესი სამხრეთი პროვინცია წლების მანძილზე სადავო იყო ანკარისა და დამასკოს მთავრობებს შორის, თუმცა 2005 წელს ასადის ხელისუფლებამ მასზე აღიარა თურქეთის ხელისუფლების სრულუფლებიანობა.